Ռուսաստանին պետք է ամբողջ Ուկրաինան իր ազդեցության գոտում պահել
ՔԱՂԱՔԱԿԱՆՈՒԹՅՈՒՆ
Այսօր ՌԴ նախագահ Վլադիմիր Պուտինը Դոնբասում սկսել է իրականացնել հատուկ ռազմական գործողություն։
Այս թեմայի մասին զրուցել ենք քաղաքագետ Ռոբերտ Ղևոնդյանի հետ։
Հարցին, թե որքա՞ն կարող են շարունակվել ռազմական գործողությունները` քաղաքագետն ասաց. « Դժվար է կանխատեսել, թե ինչքան կշարունակվի։ Պետք է հասկանալ, որ Ռուսաստանը չի սահմանափակվելու Լուգանսկի և Դոնեցկի «հարցը լուծելով», նրան պետք է ամբողջ Ուկրաինան իր ազդեցության գոտում պահել և Ռուսաստանը որոշել է արմատապես լուծել այս հարցը, ինչի մասին վկայում են, օրինակ՝ Կիևի, Խարկովի ու Օդեսայի հրթիռակոծումներն այս պահին։ Տեսնենք, թե Կիևի արևմտյան դաշնակիցներն ինչքանով կկարողանան աջակցել, որպեսզի Ուկրաինան հնարավորություն ունենա դիմակայելու այս ագրեսիային, որովհետև սա իսկապես ագրեսիա է Ուկրաինայի նկատմամբ։ Այսինքն, Կիևի արևմտյան դաշնակիցների պատասխան քայլերից հետո նոր միայն հնարավոր կլինի հասկանալ, թե ինչքան կարող է տևել այս իրավիճակը»։
Անդրադառնալով հարցին, թե արդյո՞ք Արևմուտքը կգնա լուրջ քայլերի` քաղաքագետն ասաց. «Դե, նայած թե լուրջ քայլեր ասելով՝ ինչ նկատի ունենք։ Օրինակ՝ սոցցանցերի արգելափակումը և տեղեկատվական աղբյուրներից Ռուսաստանի ու ռուսական գաղափարախոսների զրկումը բավականին լուրջ ազդեցություն է ունենալու իրադարձությունների ընթացքի վրա։ Տեսնենք, թե նման այլ ինչ միջոցներ նրանք կկարողանան մտածել, կկիրառե՞ն, թե՞ չեն կիրառի: Իհարկե, անմիջական ռազմական բախում որևէ այլ պետության ներկայացուցչի մասնակցությամբ՝ բացառում եմ, բայց այն, որ ամեն կերպ կփորձեն աջակցել Ուկրաինային, կարծես թե իրատեսական է, ուղղակի անհրաժեշտ է հասկանալ այդ աջակցության հնարավոր ծավալները, նոր միայն կարելի կլինի գնահատել, թե մինչև երբ կշարունակվի այս ամենը»։
Սոնա Գիշյան
