Քննիչ հանձնաժողովը բացահայտվեց՝ այդպես էլ գործը չսկսած

44-օրյա պատերազմի հանգամանքները հետաքննող հանձնաժողովը ձախողել է իր աշխատանքը՝ նույնիսկ չսկսելով հանգամանքների հետաքննությունը։ Ինչպես և ակնկալվում էր, հանձնաժողովն ապացուցեց, որ ընդամենը Նիկոլ Փաշինյանի և նրա վարչախմբի մեղքը կոծկող մարմին է, իսկ պատերազմի իրական հանգամանքները այդպես էլ կմնան չբացահայտված, համենայն դեպս, ոչ այս իշխանության օրոք։ Խորհրդարանական ընդդիմությունն, իհարկե, արդարացիորեն է քննադատում հանձնաժողովի աշխատանքը, աշխատանքի մեթոդները, սակայն, հրաժարվելով մասնակցել հանձնաժողովի աշխատանքներին, միայն մանևրելու ավելի լայն հնարավորություն է տալիս Անդրանիկ Քոչարյանին ու նրա ենթականերին։

Երեկ հանձնաժողովն աշխատանքային բաց քննարկում է նախաձեռնել, որին մասնակցել են նաև արտախորհրդարանական ուժերի ներկայացուցիչները՝ Սամվել Բաբայանն ու Նորայր Նորիկյանը, զոհվածների հարազատների կողմից պատվիրակված անդամներ` անկախ խորհրդատուներ Արտակ Գասպարյանն ու Գարիկ Մխիթարյանը: Օրենքը, ի դեպ, արգելում է այլ անդամների ներգրավումը հանձնաժողովի անդամներին, սակայն, ինչպես հայտնի է, օրենքները, վաղուց այլևս չեն հետաքրքրում փաշինյանական վարչախմբին։

Սամվել Բաբայանը, ով պետք է հարցաքննվեր, այլ ոչ թե հարցաքններ այդ հանձնաժողովում, ներգրավվելուց անմիջապես հետո սկսել է մեղադրել նախկիններին, Արցախի նախկին իշխանություններին։ Պատերազմի ժամանակ Արցախի անվտանգության խորհրդի քարտուղար աշխատած, ըստ ԶԼՄ-ների, մի շարք ձախողված գործողությունների պատասխանատուն, առիթը բաց չի թողել պարտության մեղքը Արցախի նախկին նախագահ Բակո Սահակյանի վրա բարդելու։ Հանձնաժողովի աշխատանքը, որքան էլ Անդրանիկ Քոչարյանը հայտարարի, թե անթերի զեկույց պիտի ներկայացնեն, այլևս վստահություն չի ներշնչում, և հանրությունն էլ վստահ է՝ այն միայն լինելու է Փաշինյանի գրպանային միավորը, մաքրելու գործող իշխանության պատասխանատվությունը։

Կարեն Եղոյան