Փաշինյանի անատամ ու հերթապահ ուղերձը Արցախի վերածննդի օրվա առիթով

Հայաստանի գործող իշխանությունները, արցախյան 44-օրյա պատերազմից հետո ձևավորված արատավոր ավանդույթի համաձայն, հրաժարվել են մասնակցել Արցախի վերածննդի օրվա տոնակատարություններին։ Փետրվարի 20-ը համարվում է Արցախի վերածննդի օր: Լեռնային Ղարաբաղի ինքնավար մարզի մարզային խորհուրդը 1988թ. փետրվարի 20-ին որոշում կայացրեց Հայաստանի կազմ տեղափոխվելու համար միջնորդել Խորհրդային Հայաստանի և Խորհրդային Ադրբեջանի օրենսդիր մարմիններին: Վարչախմբի պարագլուխ Նիկոլ Փաշինյանն ու ԱԳՆ-ն միայն հերթապահ հայտարարություններ են արել, ընդամենը հիշեցնելով, որ իրենք բարեհաճում են հիշել Արցախի մասին։

«Արցախն այսօր՝ չնայած վիրավոր, սակայն կանգուն է: Այսօր մեր քայլերն ուղղված են ոչ միայն արցախահայության սոցիալ-տնտեսական խնդիրների լուծմանը, անվտանգային մարտահրավերների հաղթահարմանը, այլև Արցախի հայության իրավունքների պաշտպանությանը, այդ իրավունքների միջազգայնորեն արձանագրմանը»,- նշել է Փաշինյանն ու հավելել․ «Համոզված եմ՝ հայ ժողովուրդը շուտով կբուժի անցած պատերազմի վերքերը և էլ ավելի վճռական ու ամուր քայլերով կընթանա դեպի ապագա՝ հանուն մեր իղձերի ու երազանքների իրականացման: Միայն այդպես կկարողանանք վառ պահել մեր բոլոր հերոս զավակների հիշատակը: Նրանց սերունդների, մեր ընդհանուր Հայրենիքի համար խաղաղ զարգացման դարաշրջան բացելը կլինի մեծագույն տուրքը նրանց հիշատակին, որով կերաշխավորվի մեր պետության հարատևությունը, Արցախի իրավունքների միջազգային ճանաչումն ու իրացումը: Այս նպատակների իրացումը պահանջում է հետևողական, շրջահայաց և ազնիվ աշխատանք ու այս աշխատանքի մեջ պիտի լինենք անսասան»:

Ինչպես տեսնում եք, որ մի բառ չկա վարչապետի պաշտոնը զբաղեցնողի ուղերձում ո՛չ Արցախի միջազգային ճանաչման, ո՛չ գերիների մասին։ Թերևս, Փաշինյանը վախենում է խոսել այդ կարևոր փաստերի մասին։ Առաջինի դեպքում վախենում է Իլհամ Ալիևի, երկրորդի դեպքում՝ հայ հանրության արձագանքից։ Հրաշալի գիտակցելով, որ երկար ամիսներ շարունակ խաբել և ստել է գերիների հարցով, տասնյակ հայորդիներ շարունակում են տառապել ադրբեջանական բանտերում, իսկ խորհրդարանական ընտրությունների քարոզարշավին գերիների հարցը դրոշակ դարձրած Փաշինյանն ու իր սպասարկուները վաղուց մոռացել են նրանց մասին։ Իր ուղերձում Փաշինյանը կրկին խոսել է խաղաղության դարաշրջանի մասին՝ այդ դարաշրջանը բացելը մեծագույն տուրք համարելով զոհերի հիշատակին։ Ավելի մեծ երեսպաշտություն և երկերեսանություն Հայաստանի Հանրապետությունն ու Արցախը երբևէ չեն էլ տեսել։

Գարիկ Մկրտչյան