Խտրական մոտեցում՝ հօգուտ Նիկոլ Փաշինյանի

Հայաստանի գլխավոր դատախազ Արթուր Դավթյանը վճռաբեկ բողոք է ներկայացրել՝ պահանջելով բեկանել տարիներ առաջ Նիկոլ Փաշինյանի գործով կայացված մեղադրական դատավճիռը և արդարացնել նրան։ Հիշեցնենք, որ Նիկոլ Փաշինյանը մեղավոր էր ճանաչվել Մարտի 1-ի անկարգությունների գործով։ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, 2010թ. հունվարի 19-ին Փաշինյանին դատապարտել էր 7 տարի ազատազրկման: 2022թ. Եվրադատարանը հրապարակել է Փաշինյանն ընդդեմ Հայաստանի գործով վճիռը՝ 2008թ. փետրվարի 19-ի նախագահական ընտրություններին հաջորդած բողոքի շարժմանը մասնակցելու համար դիմումատուի դատապարտման վերաբերյալ, որով արձանագրվել է, որ խախտվել է Փաշինյանի ազատության և անձնական անձեռնմխելիության, հավաքների ազատության իրավունքը և նրա իրավունքները հարգելու պետության պարտականությունը։

2018 թվականի իշխանափոխությունից հետո մարտի 1-ի գործերով բազմաթիվ նախկին դատապարտվածներ և նրանց փաստաբանները դիմել էին արդարացման համար, մի քանիսի գործերով դատարանը բեկանման վճիռներ էր կայացրել, որոշների գործեր էլ ամիսներ շարունակ մնացել են առանց քննության։ Եվ միայն մեկ՝ Նիկոլ Փաշինյանի դեպքում է, որ դատախազությունը հարկ է համարում վճռաբեկ բողոք ներկայացնել։ Փաստաբան Լիպարիտ Սիմոնյանն իր ֆեյսբուքյան էջում նշել է խտրական մոտեցման մասին։

«Եվրոպական դատարանը տարբեր պաշտպանյալներիս 8 գործով Կոնվենցիայի տարբեր հոդվածների խախտում է արձանագրել: Նշված գործերից ոչ մեկով ՀՀ գլխավոր դատախազը վճռաբեկ բողոք չի ներկայացրել, որպեսզի նրանց նկատմամբ կայացված մեղադրական դատավճիռները բեկանվեն, բոլորով ես եմ ներկայացրել: Օրինակ՝ Եվրոպական դատարանը Ալեքսանդր Արզումանյանի գործով էլ է ճանաչել Կոնվենցիայի 11-րդ հոդվածի խախտում, սակայն ՀՀ գլխավոր դատախազը վճռաբեկ բողոք չի ներկայացրել»,- գրել է նա:

Հիշեցնենք, որ Ալեքսանդր Արզումանյանն, օրինակ, Դանիայում, Շվեդիայում և Նորվեգիայում Հայաստանի դեսպանն է։ Փաշինյանի դեպքով էլ դատախազությունը վճռաբեկ բողոք չէր ներկայացնի, եթե վերջինս չզբաղեցներ ՀՀ վարչապետի պաշտոնը։ Այսինքն, գործ ունենք պետական դիրքի պարզ չարաշահման հետ։ Ամենևին չցանկանալով խախտել որևէ անձի անմեղության կանխավարկածը՝ այսօր չենք քննարկի մարտի 1-ի դատավճիռների իրավաչափությունը։ Խնդիրը բացառապես մեկ մարդու՝ երկրի թիվ մեկ պաշտոնը զբաղեցնողի օգտին պետական ռեսուրսի չարաշահումն է։

Նարեկ Հայրապետյան