ՀՀ կառավարության կողմից կոնկրետ քայլեր չի արվել
ՔԱՂԱՔԱԿԱՆՈՒԹՅՈՒՆ
Եվրամիությունը հայտարարել էր Հայաստանին 2․6 մլրդ եվրո աջակցություն ցուցաբերելու մասին։ Այդ ծրագրի շրջանակներում ֆինանսավորում էր ուղղվելու նաև Հյուսիս-հարավ մայրուղու և աջակցող ենթակառուցվածքների կառուցմանը։ Մենք տեսնում ենք, որ վերջին շրջանում գործընթացը դանդաղում է։ Կան տեսակետներ նաև, որ գուցե Հայաստանի իշխանությունները հրաժարվել են Հյուսիս-հարավի այդ ծրագրից, դա է պատճառը։
Այս թեմայի մասին զրուցել ենք քաղաքագետ Ստեփան Գրիգորյանի հետ։
Հարցին, թե ի՞նչ է կատարվում` քաղաքագետն ասաց․ «Պետք է ասեմ, որ ես ՀՀ կառավարության կողմից չեմ տեսնում քայլեր այդ 2․6 մլրդ-ի հետ կապված։ Մենք գոնե չենք տեսել, որ կառավարության կողմից ճանապարհային քարտեզ է պատրաստվում, չենք լսել, որ կոնկրետ քայլեր են արվել։ Եվ դա միանշանակ մտահոգիչ է, քանի որ երբ Եվրամիությունը որոշում է ընդունում, բացառվում է, որ հետ կանգնի։ Մոտավորապես մեկ տարի մենք լսում էինք, որ Եվրամիությունը ֆինանսավորում է հատկացնելու, մեր կառավարությունը պետք է դրան արձագանք տար։ Ինչ-որ քննարկումներ մենք տեսել ենք, ինչ-որ պատվիրակություններ գնում-գալիս էին, բայց հիմա չենք լսում, որ ինչ-որ քայլեր են արվում կամ հարցեր են քննարկվում։ Վերջին անգամ մոտ կես տարի առաջ լսել ենք, որ վարչապետը կառավարության նիստում խոսում էր, թե Հյուսիս-հարավի հարավային մասում աշխատանք է տարվում, այս տարի պետք է կոնկրետ աշխատանքներ սկսվեն։ Վերջին նվազագույնը 4-5 ամիսը ոչ մի բան չենք լսում։ Դա է պատճառը, որ այս իրավիճակն ինձ շատ մտահոգում է։ Մտահոգիչ է նաև այն, որ նույնիսկ եթե այդ ուղղությամբ ինչ-որ աշխատանք արվում է, հասարակությանը ոչինչ չի ասվում։ Ի վերջո հարցը միայն Հյուսիս-հարավի մասին չէ, որը մեզ համար կենսական նշանակություն ունի։ Բացի դրանից, նաև ծրագրով նախատեսված է աջակցություն փոքր ու միջին բիզնեսին, որի համար 600 մլն եվրո է հատկացված։ Խոսքը մոտ 30 հազար փոքր և միջին բիզնեսի ներկայացուցիչների մասին է։ Այսինքն՝ եթե այդ ծրագրերը գոնե սկսվեին, մենք այդ աղմուկը կլսեինք։ Ես տեղին եմ համարում, եթե ԶԼՄ-ները, տարբեր կազմակերպություններ սկսեն բարձրացնել այս հարցը և կառավարությունից պահանջել պատասխանել՝ ի՞նչ է կատարվում։ Կրկնում եմ՝ միգուցե աշխատանք տարվում է, մենք չգիտենք, բայց այս իրավիճակը մտահոգիչ է»։
Սոնա Գիշյան
