Փաշինյանը չի պահում խոստումները․ Դեսպանների քաղաքական նշանակումները չեն դադարելու
ՎԵՐԼՈՒԾՈՒԹՅՈՒՆՆԵՐ
2018 թվականի իշխանափոխությունից հետո Նիկոլ Փաշինյանի առաջին խոստումներից մեկը դիվանագիտական կորպուսը որակյալ և մասնագետ կադրերով համալրելն ու քաղաքական նշանակումներից զերծ մնալու խոստումն էր։ Իշխանափոխությունից անցել է գրեթե չորս տարի, և փաստ է՝ փաշինյանական իշխանությունը դեսպանների պաշտոնում առավել հաճախ նշանակում է դիվանագիտական աշխատանքից բացարձակ անտեղյակ անձանց, որոնց միակ «արժանիքը» Փաշինյանի հետ մտերմությունն է։
Հատկապես առաջատար երկրներում նշանակումները աչք են ծակում և տարակուսանքի առիթ դառնում։ Միացյալ Նահանգներում դեսպան նշանակվեց «Իմ քայլը» խմբակցության նախկին ղեկավար Լիլիթ Մակունցը, ով ձախողել էր աշխատանքը թե՛ որպես մշակույթի նախարար, թե՛ որպես խմբակցության ղեկավար։ Կարելի է արձանագրել, որ Մակունցը ձախողվել էր նաև որպես Նիկոլ Փաշինյանի անգլերենի ուսուցիչ, սակայն այդ ձախողումները չխանգարեցին, որ «Քաղաքացիական պայմանագիր» կուսակցության վարչության անդամին դեսպան նշանակեն ԱՄՆ-ում։
Իսպանիայում դեսպան նշանակվեց նախկին պատգամավոր Սոս Ավետիսյանը, Գերմանիայում՝ կրկին նախկին պատգամավոր Վիկտոր Ենգիբարյանը։ Իսկ Հայաստանի ռազմավարական դաշնակից երկրում՝ Ռուսաստանում, դեսպան դարձավ մեկ այլ ձախողակ՝ պաշտպանության նախկին նախարար Վաղարշակ Հարությունյանը։
Ուկրաինայում էլ դեսպան նշանակվեց Փաշինյանի նախկին խոսնակ Վլադիմիր Կարապետյանը։ Վերջինս ՀԱԿ անդամ էր, և առաջին նախագահ Տեր-Պետրոսյանը վերջինիս և այլ ճողոպրած ՀԱԿ-ականների վարքը գնահատեց որպես «առնետավազք»։
Մեր տեղեկություններով, առաջիկայում այսպիսի նշանակումներն ավելանալու են։ Մասնավորապես, Փաշինյանը մտադիր է իր օգնական, «Շիշ բռնողի» երկվորյակ եղբայր Նաիրի Սարգսյանին նշանակել դեսպան Կանադայում։ Դեսպան նշանակվելու հավակնություններ ունի նաև նախկին պատգամավոր Հովհաննես Իգիթյանը, ով զրկվեց պատգամավորական մանդատից։
Նիկոլ Փաշինյանն այլևս չի էլ հերքում, որ դիվանագիտական պաշտոնների նշանակելու է իր քաղաքական թիմի անդամներին։ «Ասում են՝ ասել ենք, որ դիվանագիտական ծառայության մեջ քաղաքական նշանակումներ սահմանափակ ենք անելու, բայց հիմա ասում ենք, որ սահմանափակ չենք անելու՝ ձեզ հայտնի պատճառներով»,- օրեր առաջ Ազգային ժողովում ասել է նա։ Հայտնի պատճառն էլ, ի դեպ, ըստ Փաշինյանի, նախկիններն են։ Գործող վարչախումբը չի վստահում ԱԳՆ-ին և դիվանագիտական կորպուսին, ցանկանում է յուրայիններին նշանակել դեսպան, որպեսզի վերահսկի այդ համակարգը։
Ձևավորված և կայուն գործող համակարգերի ոչնչացումը փաշինյանական վարչախմբի թիվ մեկ գերակայությունն է, և դրան հասնելու համար վարչապետի պաշտոնը զբաղեցնող անձը ոչնչի առջև կանգ չի առնելու։
Տիգրան Եսայան
