ԱԺ Քննիչ հանձնաժողովը միայն մեղավորներ նշանակելու համար է․ իշխանությունը տեղեկատվական ֆոն է ապահովում
ՎԵՐԼՈՒԾՈՒԹՅՈՒՆՆԵՐ
Ազգային ժողովում ստեղծված՝ 44-օրյա պատերազմի հանգամանքների քննիչ հանձնաժողովը մեն մի նպատակ ունի՝ պատերազմի մեղավորներ նշանակել բանակին և զինվորականությանը, ամեն գնով մեղքը հեռացնել փաշինյանական վարչախմբի վրայից։ Հենց այս հանգամանքն է պատճառը, որ խորհրդարանում ընդդիմադիր «Հայաստան» և «Պատիվ ունեմ» խմբակցությունները հրաժարվեցին մասնակցել հանձնաժողովի աշխատանքներին։
Խմբակցությունները երեկ հայտարարություն են տարածել, նշել, թե իշխանությունները չեն կարող օբյեկտիվորեն քննել իրենց իսկ գործողությունները։
«Դրա անհնարինության ապացույցն է նաև իշխանության և նրա ուղղակի ցուցումները կատարող ու գործադիր իշխանության մաս կազմող իրավապահ մարմինների` մեկ միասնական դիրքորոշմամբ հանդես գալը»,- նշել են ընդդիմադիրները և հավելել, թե հստակ է, որ քննիչ հանձնաժողովն իշխանությունների «անմեղության» բեմադրությանն է լծված լինելու։
Բնավ տարօրինակ չէր, որ հանձնաժողովի աշխատանքներին մասնակցելուց հրաժարվելուց հետո գործող իշխանությունն ու նրա քարոզիչները տեղեկատվական լայն արշավ սկսեցին ընդդիմության դեմ՝ մեղադրելով իբր հետաքննությունից փախչելու, իրականությանը առերեսվել չցանկանալու մեջ։ Իշխող ուժի պատգամավորներն իրար հերթ չտալով՝ ֆեյսբուքում գրառումներ էին անում, ընդդիմությանը մեղադրում պարտականությունները չկատարելու մեջ։ Այն, որ փաշինյանական վարչախումբն ունի «մեղավորներ» և ամեն գնով նրանց վրա է բարդելու պատասխանատվությունը, ապացուցվում է վերջին օրերի տեղեկատվական գրոհով։
Նախ ԱԱԾ-ն հայտնեց երկու տասնյակ զինվորականների դավաճանության մասին, ապա և դատախազությունը հաղորդագրություններ տարածեց։ Դրանցից մեկը դիվիզիոնի մայորի փախուստի մասին էր, ինչի հետևանքով քսան զինծառայող է զոհվել։ Մեկ այլ դեպքով էլ հաղորդվեց, թե պատերազմի ժամանակ երկու զինծառայող ինքնախեղում են արել, որպեսզի խուսափեն ծառայողական պարտականությունները կատարելուց։ Բնավ չենք հերքում, որ այդ դեպքերը կարող են եղած լինել։ Խնդիրն այս դեպքում համապատասխան ֆոն ապահովելն է, բանակի նկատմամբ անվստահություն տարածելը, քարոզչական զոնդաժն է, որ իշխանություններն անում են բավական հետևողականորեն։ Հանրությանը փորձում են ապացուցել, թե հայ զինվորն ու սպան դասալիք են, չեն կռվել, դավաճանել են, փախել են, և այդ պայմաններում պարտությունն անխուսափելի էր։
«Անկախ գործընթացի մանրամասներից, իշխանության համար ձեռնտու է բանակի, զինվորականի՝ այսպիսի գործերի շրջանակներում շրջանառելը, որովհետև իր արդարանալու նախապես ընտրված ճանապարհը մեղավորությունը զինված ուժերի, մոբռեսուրսի, կամավորականների վրա բարդելն է, մոտավորապես «ի՞նչ աներ խեղճ նիկոլը» սկզբունքով»,- ֆեյսբուքյան էջում գրել է ԱԺ «Պատիվ ունեմ» խմբակցության պատգամավոր Տիգրան Աբրահամյանը։
Արթուր Զաքարյան
