Հայաստանը կարող է հայտնվել պարենային խնդրի առջև

Արցախյան 44-օրյա պատերազմից հետո մասնագետներն ահազանգ էին հնչեցնում, թե Հայաստանը կարող է կանգնել պարենային լուրջ խնդրի առջև։ Մասնավորապես, ահռելի հողատարածքների կորստից հետո լուրջ խնդիր է դարձել հացահատիկի արտադրությունը, որը պարզապես գահավիժել է։ Հայաստանն այսօր ստիպված է մեծ քանակությամբ հացահատիկ ներկրել։ Եթե նախկինում Արցախում գտնվող հողերի մշակման արդյունքում Հայաստանին հաջողվում էր մեծամասամբ ապահովել հացահատիկի իր պահանջները, այսօր մեր երկիրը վերածվել է ներկրող երկրի։ Անցած տարի Հայաստանում արտադրվել է 149,6 հազար տոննա հացահատիկ։ Էկոնոմիկայի նախարարության պաշտոնական տվյալներով, 2019-ին Հայաստանում արտադրվել է 195 հազար տոննա, իսկ 2020-ին՝ 241,9 հազար տոննա։ Ըստ էության, 2021 թվականին արտադրության անկումը նախորդ տարվա համեմատ կազմել է 38%։

Ավելի վաղ NEWS.am-ը հայտնել էր, որ 44-օրյա պատերազմից հետո ավելացել է պարենային ցորենի ներկրումը Հայաստան (458,7 հազար տոննա, որից ցորենի ներկրումը՝ 349,8 հազար տոննա) 30%-ով։ Հացահատիկի դեֆիցիտի ևս մեկ պատճառ, հավանաբար, անմշակ վարելահողերի բարձր տեսակարար կշիռն է, որը հասնում է մինչև 50%-ի: Պատերազմի հետևանքները դեռ երկար են հետապնդելու Հայաստանին, եթե գործող իշխանությունները ռեալ միջոցներ չձեռնարկեն իրավիճակը շտկելու ուղղությամբ։ Այդպիսի միջոցներ, իհարկե, մենք չենք տեսնում, քանի որ վարչախումբը զբաղված է բացառապես ներքաղաքական խարդավանքներով, իշխանությունն ամեն գնով պահպանելու քայլերով։ Արդյունքում, շեշտակի նվազում է ժողովրդի կենսամակարդակը, հանրապետությունն էլ հայտնվել է տնտեսական ծանրագույն կացության առջև։ Նման վիճակը, ինչ-որ պահի լուրջ ցնցումների է հանգեցնելու, և փաշինյանական վարչախումբը հրաշալի հասկանում է այս փաստը։

Նարեկ Արշակյան