Վանաձորը մնացել է առանց իշխանության․ ընդդիմության դեմ հալածանքները շարունակվում են

Դատարանը որոշեց երկու ամսով երկարացնել Վանաձորի նախկին համայնքապետ Մամիկոն Ասլանյանի կալանքի ժամկետը։ Նա պաշտոնեական լիազորությունները չարաշահելու և պաշտոնեական կեղծիք կատարելու մեղադրանքով կալանավորված է դեկտեմբերի կեսերից։ Մի քանի օր առաջ Քննչական կոմիտեն հաղորդել էր, որ լրացվել է նրա մեղադրանքը պաշտոնավարման տարիներին կատարած ենթադրյալ հանցանքների նոր դրվագներով։ Մասնավորապես իրավապահները նոր փաստեր էին հրապարակել, ըստ որոնց` նախկին համայնքապետն անցած 5 տարիներին մի շարք հողատարածքների դեպքում համայնքի գլխավոր հատակագծում փոփոխություն է արել և ընդհանուր օգտագործման հասարակական կանաչ տարածք հանդիսացող, սեփականաշնորհման ոչ ենթակա հողերը դարձրել հասարակական կառուցապատման տարածքներ, որի դեպքում թույլատրվել է դրանց աճուրդ-վաճառքը։ Թե՛ Ասլանյանը, թե՛ նրա փաստաբանները հերքում են այս մեղադրանքը։

Վանաձորում ՏԻՄ ընտրություններից հետո արտառոց իրավիճակ է ստեղծվել, երբ քաղաքային իշխանություն որպես այդպիսին գոյություն չունի, իսկ իշխանությունն ամեն ինչ անում է, որպեսզի յուրացնի Վանաձորը։ Ընդ որում, այս հարցում իշխանությունը երկու նպատակ ունի։ Նվազագույնը՝ Մամիկոն Ասլանյանին զրկի քաղաքապետ դառնալու հնարավորությունից, իսկ առավելագույնը՝ դատական կարգով նոր ՏԻՄ ընտրություններ պարտադրի Վանաձորում։ Մամիկոն Ասլանյանը կալանավորվել էր դեկտեմբերի 5-ին տեղի ունեցած ավագանու ընտրություններից հետո, որի արդյունքներով նրա գլխավորած դաշինքն ամենաշատ թվով ձայներն էր ստացել, և հավանական էր, որ ավագանի անցած «Հայրենիք» կուսակցության աջակցությամբ կարող էր համայնքապետ ընտրվել։

Ընտրություններից երկու ամիս անց դեռ ավագանին համայնքի ղեկավար չի ընտրել։ Դատարանն ընտրություն անցկացնելու արգելք է սահմանել։ Իհարկե, տուժում է Հայաստանի երրորդ քաղաքը, որտեղ խախտվել են որոշումներ կայացնելու մեխանիզմները։ ՔՊ-ն քաղաքապետի ժամանակավոր պաշտոնակատար է նշանակել, ում միջոցով էլ փորձում է ամրապնդվել տեղում, հեռացնել անցանկալի տարրերին, հնարավորություն ստեղծել նոր ընտրություններ անցկացնելու։ Մեծ հավանականությամբ, «Քաղաքացիական պայմանագիրը» կպարտվի նաև հաջորդ ընտրություններում, քանի որ վանաձորցիներն էլ զայրացած են իշխանության այս վարքից։ Այդ հանգամանքը, սակայն, չի մտահոգում «ժողովրդավարությունը բրենդ» դարձրած Նիկոլ Փաշինյանին ու նրա կողմնակիցներին։

Արեն Նահապետյան