Վարչախումբը լծվել է սահմանադրությունը յուր ճաշակով փոխելու գործընթացին
ՎԵՐԼՈՒԾՈՒԹՅՈՒՆՆԵՐ
Հայաստանի գործող իշխանությունները ողջ թափով լծվել են Սահմանադրական բարեփոխումների գործընթացին։ Սահմանադրական բարեփոխումների խորհուրդն արդեն մեկ նիստ գումարել է, քննարկել են միայն տեխնիկական հարցեր, իսկ երկրորդ նիստում, որը կայանալու է փետրվարի 16-ին, խորհուրդն ընտրելու է մասնագիտական հանձնաժողովի անդամների՝ պրոֆեսիոնալ իրավաբանների։ Խորհրդի առաջին նիստին չի մասնակցել Մարդու իրավունքների պաշտպան Արման Թաթոյանը։ Վերջինիս, հիշեցնենք արդեն փետրվարի 23-ից փոխարինելու է նորանշանակ օմբուդսմենը՝ Փաշինյանի կողմնակից Քրիստինե Գրիգորյանը։ Գործող վարչախումբն ինքն էլ շահագրգռված է, որ Թաթոյանին հեռու պահի խորհրդի աշխատանքներից, ուստի առաջին նիստերը տեխնիկական հարցերի քննարկմամբ են սահմանափակվելու, մինչև Թաթոյանն այլևս հնարավորություն չունենա մասնակցել նիստերին, իր մոտեցումները ներկայացնի սահմանադրական բարեփոխումների վերաբերյալ։ Թերևս, հենց այդ հանգամանքն է պատճառ դարձել, որ Մարդու իրավունքների պաշտպանը չի մասնակցել առաջին նիստին։
Ձևավորված խորհուրդը բաղկացած է իշխանության ներկայացուցիչներից, իշխանամերձ իրավապաշտպաններից և գործող իշխանությանը սատարող երկու արտախորհրդարանական կուսակցությունների ներկայացուցիչներից։ Խորհրդարանական ընդդիմությունը հրաժարվել է մասնակցել, ուստի և որևէ «բարեփոխման» միակ պատասխանատուն փաշինյանական իշխանությունն է լինելու։ Ուշագրավն այն է, որ խորհուրդը համառորեն չի բարձրաձայնում՝ արդյո՞ք փոխելու են պետական կառավարման կարգը, թե՞ ոչ, կպահպանեն Նիկոլ Փաշինյանի բնորոշած սուպերվարչապետական համակարգը, թե՞ մեկ այլ՝ Փաշինյանի հագով կոստյում կկարեն։
Արդարադատության տխրահռչակ նախարար, Սահմանադրական բարեփոխումների խորհրդի նախագահ Կարեն Անդրեասյանն է երեկ հայտարարել, թե Սահմանադրական փոփոխությունների նպատակը իշխանության թևերի բալանսավորումն է։
«Իմ խորին համոզմամբ մեր ներկայիս Սահմանադրության մեջ խախտված է բալանսավորումը իշխանության տարբեր թևերի մեջ, և այդ բալանսավորման շտկման համար է նաև, կարծում եմ, նախատեսված այս գործընթացը, և, այո՛, կարող ենք այսպես անվանել, էնպես անվանել, քաղաքական դիսկուրսում կարող են լինել նաև որոշակի ավելի խիստ բնորոշումներ, որոնք մենք բոլորը հարգում ենք», - ասել է նախարարը։
Փաշինյանը, նշենք, արդեն իսկ հայտնել է, թե դեմ է կառավարման կիսանախագահական համակարգին վերադառնալուն։ Ըստ էության, այդ հայտարարությունն ակնարկ էր, որ ինչ էլ ստացվի վերջնարդյունքում, լինելու է հանուն Նիկոլ Փաշինյանի, այլ ոչ հանուն Հայաստանի Հանրապետության։
Սամվել Լևոնյան
