Հայ-թուրքական բանակցություններում տարօրինակ վիճակ է
ՎԵՐԼՈՒԾՈՒԹՅՈՒՆՆԵՐ
Հայաստանն առայժմ չի հաստատել Թուրքիայի Անթալիա քաղաքում մարտին կայանալիք դիվանագիտական համաժողովին իր մասնակցությունը։ Այդ մասին հայտարարել է Թուրքիայի արտգործնախարար Մևլյութ Չավուշօղլուն ֆինլանդացի պաշտոնակցի հետ համատեղ ասուլիսի ժամանակ։
«Գիտնականների և մյուս հրավիրյալների հետ մեկտեղ հատուկ ներկայացուցիչ Ռուբինյանին և արտգործնախարարին հրավեր ենք ուղարկել: Փաշինյանին հրավեր չենք ուղարկել, երկրների ղեկավարներին նախագահն է հրավեր ուղարկում: Այս պահին մոտ 60 նախարար հաստատել է իր մասնակցությունը: Հայաստանից հաստատում դեռ չենք ստացել»,- ասել է Չավուշօղլուն:
Ավելի վաղ, հիշեցնենք, Թուրքիայի փոխնախագահ Ֆուաթ Օքթայը հայտարարել էր, որ Նիկոլ Փաշինյանը մարտին այցով կմեկնի Թուրքիա:
«Փաշինյանը մարտին այցով կժամանի Թուրքիա և կմասնակցի Անթալիայում կայանալիք դիվանագիտական համաժողովին»,- թուրքական պարբերականները մեջբերել էին Օքթային:
Եվ այժմ ԱԳ նախարարն ինքն է հերքում երկրի փոխնախագահի հայտարարությունները։ Ըստ երևույթին, Թուրքիայի իշխանությունները նախապես փորձել են սադրանք իրականացնել, Հայաստանի ղեկավարությանը պարտադրել մասնակցել իրենց համաժողովին, իսկ այժմ ստիպված են ԱԳ նախարարի մակարդակով հերքել փոխնախագահին։ Անհնարին է, որ Օքթայն առանց Թուրքիայի նախագահի և ԱԳՆ-ի հետ համաձայնեցնելու նման հայտարարություններ աներ։
Չավուշօղլուն խոսել է նաև փետրվարի 24-ին Վիեննայում կայանալիք հատուկ ներկայացուցիչների՝ Ռուբեն Ռուբինյանի և Սերդար Քըլըչի երկրորդ հանդիպումից, հայտարարել, թե հանդիպումը Վիեննայում է անցկացվելու հայկական կողմի ցանկությամբ: Նա նշել է, որ կողմերի միջև հեռախոսազրույցի ժամանակ առաջարկվել է բանագնացների երկրորդ հանդիպումը անցկացնել Ավստրիայում կամ Շվեյցարիայում։
«Պարոն Սերդարի հետ խորհրդակցեցինք և հաշվի առնելով նախկինում Ժնևում արձանագրված անհաջողությունը` որոշեցինք Վիեննան ընտրել, որպեսզի նույնը չշարունակվի»,- ասել է թուրք նախարարը: Ամեն դեպքում, Թուրքիայի այս սիրալիրությունը, անգամ սիմվոլիզմը հաշվի առնելը որևէ դրական հետևանք չի կարող ունենալ Հայաստանի համար։ Եվ ՀՀ իշխանությունները պարտավոր են խուսափել գոնե այս պահին չկշռադատված որոշումներ կայացնելուց, ինչին նրանց հետևողականորեն մղում է թուրքական կողմը։
Միքայել Ավետիսյան
