Հայաստանի ԱԳՆ անատամ հայտարարություններն ու իշխանական պատգամավորների «խրոխտ» արձագանքը
ՎԵՐԼՈՒԾՈՒԹՅՈՒՆՆԵՐ
Հայաստանի ԱԳՆ-ն երեկ վերջապես արձագանքեց Բելառուսի նախագահ Ալեքսանդր Լուկաշենկոյի լպիրշ հայտարարություններին, ԱԳՆ խոսնակի անատամ և ոչինչ չասող հայտարարությամբ։ Հիշեցնենք, Բելառուսի նախագահը Սոլովյովին տված հարցազրույցում խոսել էր Միութենական պետության կազմում տարբեր երկրների ներգրավման մասին, վստահություն հայտնել, թե Հայաստանը փախչելու տեղ չունի։
«Հայաստանը փախչելու տեղ չունի, կարծո՞ւմ եք` նրանք ինչ-որ մեկին պետք ե՞ն, իրենք արդեն տեսել են, Նիկոլ Վովաևիչը դա արդեն տեսել է», - ասել էր Լուկաշենկոն։
Այս հայտարարությունից հետո սոցցանցերն ու հանրությունն արդարացիորեն պահանջում էին, որ ՀՀ պատկան մարմինները խստորեն արձագանքեն, արժանի պատասխան տան Բելառուսի՝ չափը կորցրած նախագահին։ ԱԳՆ-ում, թերևս, երկար են մտածել, թե ինչ պատասխան տան, որ ո՛չ «շիշը վառեն, ո՛չ քաբաբը»։
«Համոզված ենք, որ Բելառուսի նախագահի աշխարհաքաղաքական ինքնատիպ վերլուծությունները նպատակ ունեն սպասարկելու առաջին հերթին սեփական ներքին քաղաքական օրակարգը և որևէ առնչություն չունեն Հայաստանի և նրա արտաքին քաղաքականության հետ», - հայտարարել էր ԱԳՆ մամուլի խոսնակ Վահան Հունանյանը։
Ավելի ուշ իշխանական մամուլը տեղեկություն տարածեց, թե Բելառուսի դեսպանն այցելել է ԱԳՆ։ Վահան Հունանյանն ինքն էլ հաստատեց, որ Հայաստանում Բելառուսի դեսպան Ալեքսանդր Կոնյուկը եղել է ԱԳՆ-ում, բայց այդպես էլ չպարզաբանեց՝ արդյո՞ք բողոքի նոտա հղվե՞լ է, թե՞ ոչ։ Ուշադրություն դարձրեք ձևակերպումներին։ Լուկաշենկոյի լպիրշությանը ԱԳՆ-ն պատասխանում է չափազանց մեղմ, վախվխելով և կարկամած։ Փոխարենը, «առյուծ» էին կտրել խորհրդարանում։ Իշխող ուժը Հովիկաղազարյանններով ու Վաղարշակհակոբյաններով էր պատասխանում Լուկաշենկոյին։ «Լուկաշենկոներն ու մարգարիտասիմոնյանները իրենց գործունեությամբ արջի ծառայություն են մատուցում Ռուսաստանի իշխանություններին և ռուսական պետականությանը»,- ասել է Հովիկ Աղազարյանը, իսկ Վաղարշակ Հակոբյանն էլ դատապարտել էր Լուկաշենկոյի որակումները. - «Մեր գործընկեր երկրի ղեկավարը իրավունք չունի նման մտքեր արտահայտել մյուս գործընկեր երկրի նկատմամբ։ Եվ ես ուզում եմ հիշեցնել վերջերս ղազախական դեպքերի ժամանակ, թե ում էր պետք Հայաստանը»։
Իհարկե, խորհրդարանում իշխող ուժի ներկայացուցիչների հայտարարությունները բոլորովին համադրելի չեն ԱԳՆ-ի կամ վարչապետի աշխատակազմի պատասխանի հետ։ Իսկ Փաշինյանն ու իր աշխատակազմը ամեն կերպ խուսափում են կոշտ արձագանքելուց։ Ընդհանրապես, 44-օրյա պատերազմից հետո Փաշինյանն իր «դուխի» մասին հիշում է միայն ներքաղաքական օրակարգում, իսկ արտաքին գործընկերների հետ հարաբերվելիս բերանը ջուր է առնում։
Նարեկ Հայրապետյան
