Հայաստանը գնում է սխալ ճանապարհով․ քաղաքացին արձանագրում է, բայց չի ընդվզում

Միջազգային հանրապետական ինստիտուտի (International Republican Institute) սոցհարցման արդյունքներով՝ Հայաստանում նվազել է այն մարդկանց թիվը, ովքեր կարծում են, որ երկիրը շարժվում է ճիշտ ուղով: Վերջին հետազոտությունը, որ իրականացվել էր դեկտեմբերին և հրապարակվել օրեր առաջ, փաստում է՝ հարցման մասնակիցների 34%-ն է կարծում, որ «Հայաստանը շարժվում է ճիշտ ուղով», իսկ 46%-ի կարծիքով՝ երկիրը ընթանում է «սխալ ուղղությամբ»: Մինչդեռ հուլիսին հարցվածների 41%-ը վստահ էր, որ «Հայաստանը ճիշտ ուղու վրա է», հակառակ կարծիքին էր հարցման մասնակիցների 34%-ը:

Փաստացի, հանրության զգալի մասը՝ 7 տոկոսը չորս-հինգ ամսվա ընթացքում փոխել է իր կարծիքը, արձանագրել, որ երկիրը շարժվում է սխալ ճանապարհով։ Իհարկե, սա մտահոգիչ է գործող վարչախմբի համար, որը ջանք ու եռանդ չի խնայում հանրությանը համոզելու հակառակի մեջ։ Բնական է, կարծիքի վատթարացման գործում իրենց դերն ունեն թե՛ տնտեսական, թե՛ քաղաքական գործոնները։ Նաև, անհնար է երկար մոլորեցնել մարդկանց, խաբել ու ստել։ Ի վերջո, հանրությունն ինքն էլ հասկանալու է այդ տրիվիալ ճշմարտությունը։ Շան գլուխն, իրականում այլ տեղ է թաղված։

Ինչո՞ւ ՀՀ քաղաքացիները չեն ընդվզում գործող վարչախմբի դեմ, չեն հեռացնում «երկիրը սխալ ճանապարհով» տանողների դեմ, իսկ հունիսին հանրության 54 տոկոսը կողմ քվեարկեց փաշինյանական վարչախմբին։ Այսօր տասնյակ ու հարյուրավոր մեկնաբանություններ կարելի է անել այդ կապակցությամբ, վերլուծել, թե ինչը հանգեցրեց այդ զարգացմանը։ Մինչդեռ, Հայաստանի մշուշոտ ապագան այլևս թույլ չի տալիս զբաղվել անիմաստ զրույցներով։ Ընդդիմության համար պարարտ հնարավորություն է ստեղծվել իշխանության ղեկից հեռացնելու փաշինյանական վարչախմբին և եթե այս պայմաններում, երբ հանրության գերակշիռ մասը դժգոհ է գործող իշխանություններից և նրանց վարած քաղաքականությունից, ընդդիմությանը չհաջողվի հեռացնել նրանց, ապա կարող է ընդամենը երկու տարբերակ ծագել, կա՛մ այդ ընդդիմությունը ծախված է, կա՛մ էլ ապիկար։ Ամեն դեպքում, փաշինյանական վարչախումբը լուրջ մտահոգվելու տեղիք ունի։ Եթե ոչ այսօր, ապա վարկանիշի սրընթաց գահավիժման պայմաններում Նիկոլ Փաշինյանն ու իր խառնակույտը երկար չեն կարողանալու մնալ իշխանության ղեկին։

Մարատ Գրիգորյան