Հայաստանի իշխանությունները՝ թուրքական քարոզչական թակարդում

Հայաստանի ԱԳ նախարար Արարատ Միրզոյանը դրական ազդակներ է տեսնում, որ հայ-թուրքական հարաբերությունների նորմալացման գործընթացը կընթանա բարեհաջող։ Միրզոյանն այդ մասին ասել է երեկ՝ Ավստրիայի եվրոպական և արտաքին գործերի դաշնային նախարար Ալեքսանդր Շալենբերգի հետ համատեղ ասուլիսում։ Միրզոյանը ընդգծել է՝ Թուրքիայի հետ հարաբերությունների առումով Հայաստանի դիրքորոշման մեջ նախորդ երեսուն տարիներին մեծ հաշվով ոչինչ չի փոխվել, ու Երևանը կողմ է առանց նախապայմանների դիվանագիտական հարաբերությունների հաստատմանը և սահմանի վերաբացմանը։ Խոսելով Անթալիայի դիվանագիտական ֆորումին մասնակցության հնարավորության մասին՝ Արարատ Միրզոյանը չի հերքել մասնակցության հնարավորությունը։

«Այո՛, ես և պարոն Ռուբինյանը հրավեր ենք ստացել մասնակցելու Անթալիայի միջոցառմանը։ Հայաստանի Հանրապետության արտաքին գործերի նախարարությունը այս մասով դեռևս որոշում չունի, հարցը քննարկվում է։ Ուղղակի ուզում եմ նշել, որ, ըստ էության, կարևոր է ընդգծել, որ երկկողմ այց չի և երկկողմ համատեքստում պետք չի դիտարկել։ Սա միջազգային դիվանագիտական իրադարձություն է, որին կարող է և Հայաստանի Հանրապետությունը որոշի մասնակցել։ Ես այդտեղ ոչ միայն խնդիր չեմ տեսնի, այլև կարծում եմ, որ նույնիսկ եթե այն շաղկապենք Հայաստան-Թուրքիա երկխոսության հետ, դրական երանգներ հաղորդելուց բացի, այլ բան չունի», - նշել է Հայաստանի արտգործնախարարը։

Անթալիայի դիվանագիտական ֆորումը, նշենք, մի հարկի տակ է հավաքում թյուրքական պետությունների ներկայացուցիչներին, և արևմտյան երկրների ներկայացուցիչները հազվադեպ են մասնակցում այդ համաժողովին։ Փաստացի, մասնակցելով այդ համաժողովին, Հայաստանի գործող իշխանությունները հայտնվելու են թուրքական թակարդի մեջ, գիտակցված կամ անգիտակցաբար ծառայելու են Էրդողանի իշխանության քարոզչությանը։ Դժվար չէ կռահել, որ Թուրքիայի ղեկավարությունը հենց այդ նպատակով էլ հրավիրում է հայկական կողմին՝ ֆորումը հայ-թուրքական բանակցություններն իր դաշտում անցկացնելու նպատակով։ Մոսկվայում Ռուբինյանի և Քըլըչի առաջին հանդիպումից հետո Թուրքիան նպատակ է դրել այդ գործընթացից հեռացնել ոչ միայն Ռուսաստանին, այլև մյուս շահագրգիռ կողմերին, և Հայաստանի ներկայացուցիչների հետ հարցերը քննարկել իրեն ձեռնտու մեկնաբանություններով։ Այս առումով, առնվազն տարօրինակ է ՀՀ իշխանությունների վարքը, համաժողովին մասնակցելու առայժմ քողարկված ցանկությունները։ Եթե, իհարկե, այլ ծպտյալ ծրագրեր փաշինյանական վարչախումբը չունի։

Վարդգես Աբգարյան