Դատական համակարգի դեմ ճնշումները սաստկանում են

Փաշինյանական վարչախումբը նոր թափով է լծվել դատական համակարգը խեղելու իր գործելաոճին։ Իշխանությունները, մեր տեղեկություններով, վերջնականապես զայրացել են դատական համակարգում գործող անկախ դատավորների վարքից և մտադիր են ամեն գնով ճնշել անհնազանդության դրսևորումները։ Բարձրագույն դատական խորհուրդն օրերս որոշում է կայացրել կասեցնել Սյունիքի մարզի ընդհանուր իրավասության դատարանի դատավոր Բորիս Բախշիյանի լիազորությունները։ Դատավորն ընդամենը համարձակվել էր արդարացի դատական ակտ կայացնել քաղաքական երանգավորում ունեցող մի քանի գործերում, կալանքից ազատ էր արձակել ազատամարտիկ, «Սիսական» ջոկատի հրամանատար Աշոտ Մինասյանին, Քաջարանի քաղաքապետ Մանվել Փարամազյանին, Գորիսի փոխքաղաքապետեր Մենուա Հովսեփյանին և Իրինա Յոլյանին։ 

Փաշինյանական իշխանությունն էլ որոշել է այդ անձանց փոխարեն կալանավորել հենց դատավորին։ Այդկերպ, վարչախումբը մտածում է ահաբեկել մյուս դատավորներին, ստիպել, որ կա՛մ հրաժարական ներկայացնեն, կա՛մ էլ անցնեն ապիկար իշխանության թրի տակով։ ԱԱԾ-ն փորձում է Սյունիքի մարզի ընդհանուր իրավասության դատարանի դատավոր Բորիս Բախշիյանին մեղադրել Մանվել Փարամազյանի դեմ ցուցմունք տված Փաշինյանի աջակցին ապօրինի կալանավորելու համար, թեև Փաշինյանի աջակիցն ինքն էր դրսևորել ոչ պատշաճ վարքագիծ՝ չներկայանալով դատական նիստերին։ Կարգապահական մեկ այլ վարույթ էլ հարուցվել է վարչական դատարանի դատավոր Դանիել Դանիելյանի նկատմամբ, ով մերժել էր Վանաձորի ընտրությունների վերաբերյալ հայցը։ 

Նիկոլ Փաշինյանը չորս տարում կարողացել է մի քանի հավատարիմ դատավորներ կենտրոնացնել տարբեր դատարաններում, իսկ գործերի մակագրման ավտոմատ համակարգի առգրավումից հետո ձեռքով են կալանքի և այլ քաղաքական գործերի մակագրումներն իրականացվում իշխանությանը լոյալ դատավորներին։ Այս իրավիճակում դատական համակարգը մեկ անելիք ունի՝ համախմբվել, ցույց տալ սեփական ուժն ու արժանապատվությունը, թույլ չտալ փաշինյանական վարչախմբին՝ կոտրելու դիմադրության վերջին օջախը։

Արթուր Թորոսյան