Թուրքիայի գլխավոր պահանջը․ հրաժարվել Հայոց ցեղասպանության ճանաչումից

Հայ-թուրքական կարգավորման գործընթացում Թուրքիայի գլխավոր պահանջը մեկն է՝ հրաժարվել Հայոց ցեղասպանության միջազգային ճանաչման գործընթացից։ Թեպետ թուրքական պաշտոնական աղբյուրներն առայժմ հրապարակային մակարդակում զերծ են մնում նախապայմաններ առաջ քաշելուց, ակնհայտ է, որ այդ երկիրը, օգտվելով Հայաստանում ստեղծված իրավիճակից, գործող փաշինյանական վարչախմբի ապազգային էությունից, փորձում է առաջ մղել այս կարևոր նախապայմանը, պարտադրել Հայաստանին՝ հրաժարվել Ցեղասպանության միջազգային ճանաչման գործընթացից։

Նախօրեին էլ Թուրքիայի «Ճշմարիտ ուղի» կուսակցության նախագահ Չեթին Օզաչըքգյոզը հայ-թուրքական հարաբերությունների հետ կապված հայտարարությամբ է հանդես եկել։ Նա պնդել է, թե առանց Հայաստանի կողմից Ցեղասպանության ճանաչումից հրաժարվելու Հայաստանի հետ հարաբերություններ հաստատելը Թուրքիայի հայրենասիրությանը դեմ է, և Թուրքիայի ԱԳՆ-ն պետք է սա լավ քննարկի։ Փաստացի, Թուրքիայի համար հրաշալի հնարավորություն է ստեղծվել մեկընդմիշտ ազատվելու իր պատմության ամենածանր բեռից։ Հայաստանում այսօր իշխում է ապազգային, թույլ և դավադիր մի խմբակ, որի թիվ մեկ գերխնդիրն ամեն գնով իշխանություն պահելն է։ Եվ փաշինյանական վարչախումբը որևէ կարմիր գիծ չունի ո՛չ Հայոց ցեղասպանության ուրացման, ո՛չ էլ Արցախի ուրացման հարցերում։

Թուրքական իշխանությունները, ՀՀ ԱԳ նախարար Միրզոյանին, ԱԺ փոխնախագահ, հայ-թուրքական բանակցություններում հայկական կողմի բանագնաց Ռուբեն Ռուբինյանին Անթալիայի համաժողովին հրավիրելով՝ ցանկանում են իրենց ձեռքը վերցնել նախաձեռնությունը, Ռուսաստանին զրկել կարգավորման գործընթացում ունեցած ազդեցությունից։ Հայկական իշխանությունների համար էլ լավ հնարավորություններ են բացվում Թուրքիայի հետ բիզնես անելու, միջոցներ ներգրավելու, թուրքական կապիտալով Հայաստանում իրենց ազդեցությունը պահպանելու համար։ Արդեն ապրիլին, Ցեղասպանության տարելիցի օրը պարզ կդառնա փաշինյանական իշխանությունների իրական դիրքորոշումը։ Չի բացառվում, որ կրկին հայտարարեն կորոնավիրուսով հերթական անգամ վարակվելու, այդ պատրվակով Ծիծեռնակաբերդ չբարձրանալու հանգամանքի մասին։

Արշալույս Գրիգորյան