Պաշտոնական Երևանը տարակուսած է, բայց հրաժարվում են բացահայտել հայկական առաջարկները
ՎԵՐԼՈՒԾՈՒԹՅՈՒՆՆԵՐ
Հայաստանի պատկան մարմինները չեն բացահայտում, թե ՌԴ միջոցով սահմանազատման և սահմանագծման հարցով ինչ առաջարկներ են ներկայացրել Ադրբեջանին, որ վերջինս էլ մերժել է դրանք։ Հայկական կողմի առաջարկների մասին հունվարի 14-ին տեղեկացրեց Ռուսաստանի արտգործնախարարը։ Սերգեյ Լավրովն ասել էր, որ Հայաստանը նոր առաջարկներ է ներկայացրել Ադրբեջանի հետ սահմանազատման հանձնաժողով ձևավորելու հարցով, որը ռուսական կողմի միջոցով փոխանցվել է Բաքվին։ Ավելի ուշ ԱԺ-ում Միրզոյանը հայտարարեց, որ առաջարկները բխում են զորքերի հայելային հետքաշման և հավելյալ անվտանգության մեխանիզմների ստեղծման հայեցակարգից։
Սրան հաջորդեց հունվարի 20-ին Ադրբեջանի արտգործնախարար Ջեյհուն Բայրամովի հայտարարությունը, թե Երևանի «նախապայմանները» Բաքվի համար անընդունելի են։ Հայաստանի ԱԳ նախարար Արարատ Միրզոյանը միայն երեկ է արձագանքել այս հայտարարությանը, այն էլ՝ Եռաբլուրում, լրագրողների պնդմամբ։ Նա նշել է, թե պաշտոնական Երևանը փորձում է պարզաբանումներ ստանալ, թե սահմանազատման և սահմանագծման հարցով Հայաստանի առաջարկներից հատկապես որն է անընդունելի Բաքվի համար։
«Ի՞նչ պահով են անընդունելի իրենց համար, հավանաբար նկատի ունեք. մենք հստակեցումները դեռ չունենք, ճշգրտման փուլում են այդ հստակեցումները։ Քննարկում անընդհատ կա, քննարկումը շարունակվում է, և Ձեր հնչեցված հարցում, ըստ էության, պատասխանը կա, հիմա մենք փորձում ենք պարզաբանումներ ստանալ, թե հատկապես որ մասն է անընդունելի, ինչ հիմնավորմամբ, և ըստ այդմ ինչպիսի նոր լուծումներ կարող են լինել», - նշել է նախարարը։
ԱԳ նախարարն այս անգամ էլ չի բացահայտել առաջարկների էությունը։ Հայելային հետքաշման անթույլատրելիության մասին նշել էր հեռացող օմբուդսմեն Արման Թաթոյանը՝ նշելով, թե նման քայլը վտանգում է սահմանամերձ դարձած գյուղերի բնակիչների անվտանգությունն ու իրավունքները։ Հստակ է, որ Ադրբեջանը շարունակելու է իր հետևողական քաղաքականությունը՝ ահաբեկելով Հայաստանի և Արցախի քաղաքացիներին՝ անտանելի դարձնելով նրանց կյանքը, կտոր-կտոր պոկելով հայկական տարածքները։ Ողջամիտ որևէ հակաքայլ հայկական կողմից այսքան ժամանակ չենք տեսել։ Անցած տարվա մայիսից ադրբեջանական հրոսակները գտնվում են ՀՀ ինքնիշխան տարածքում, և փաշինյանական վարչախումբը ոչինչ չի ձեռնարկում նրանց մեր տարածքից հեռացնելու ուղղությամբ։
Սարգիս Դանիելյան
