Վիրավոր ու բզկտված․ Հայոց բանակը նշում է կազմավորման 30-ամյակը
ՎԵՐԼՈՒԾՈՒԹՅՈՒՆՆԵՐ
Հայաստանի Հանրապետությունը նշում է զինված ուժերի կազմավորման 30-րդ տարեդարձը․ նշում է տխուր, գլխահակ, առանց տոնական միջոցառումների։ Առաջին տարին է, երբ երկրի վարչապետի պաշտոնը զբաղեցնող անձը նույնիսկ Եռաբլուր չի գնում՝ հարգանքի տուրք մատուցելու զոհվածների հիշատակին, հանրապետության նախագահն էլ տակավին օրեր առաջ է հրաժարականի դիմում ներկայացրել և գտնվում է իր հայրենի Լոնդոնում։
Փաշինյանի աշխատակազմը նախօրեին էր հայտնել, թե նա կորոնավիրուսի թեստ է հանձնել և այժմ ինքնամեկուսացել է։ Կորոնավիրուսը պատրվակ է բերել և Եռաբլուր այցից խուսափել է նաև ԳՇ պետ Արտակ Դավթյանը։ Չեղարկել են նաև նախատեսված տոնական միջոցառումները։ Փոխարենն այսօր ուղերձների և կոչերի տարափ է սոցցանցերում և ԶԼՄ-ներում։ Ինքը՝ Փաշինյանը հայտարարել է, թե Հայաստանի Հանրապետությունն ունենալու է պրոֆեսիոնալ բանակ, և կառավարությունն այդ աշխատանքը կատարելու է անհոգնել, առանց ընկճվելու և առանց հոռետեսության՝ ապագա անվտանգային միջավայրը կառուցելու ճանապարհին լավատեսությամբ զինված։ Վարչապետն ընդգծել է՝ բանակի մարտունակությունը, սպառազինությունը, ծառայության պայմանները բարելավելն իրենց առաջնահերթությունն է։
«Զինվորական, սպայական ծառայությունը պիտի լինի հանրային առանձնահատուկ հարգանքի և պատկառանքի առարկա, ինչը պիտի արտահայտվի նաև զինծառայողների և նրանց ընտանիքի անդամների սոցիալական հատուկ երաշխիքների համակարգով», - իր ուղերձում նշել է վարչապետը՝ շեշտելով՝ զուգահեռ պիտի բարձրանան նաև ծառայության գնահատման՝ ինտելեկտուալ, պրոֆեսիոնալ, ֆիզիկական ու հոգեբանական պատրաստության չափանիշները, և այս կետերի վրա պետք է հենվի հանրային հարգանքն ու պատկառանքը բանակի նկատմամբ: Նմանատիպ խրոխտ ձևակերպումներ են գործող վարչախմբի մյուս պաշտոնյաների ուղերձներում ևս։ Իհարկե, բառ անգամ չկա տարուց ավելի ադրբեջանական բանտերում կտտանքների և խոշտանգումների ենթարկվող ռազմագերիների մասին․ տպավորություն է, թե փաշինյանական իշխանությունը վաղուց և անվերադարձ մոռացել է նրանց մասին։
Բառ չկա Ադրբեջանի կողմից ՀՀ ինքնիշխան տարածք ներխուժելու, ամիսներ շարունակ ՀՀ բնակչության իրավունքները խախտելու մասին։ Բառ անգամ չկա, թե ինչպես է իշխանությունը փորձում պատերազմում կրած պարտության ամբողջ մեղքը բարդել զինված ուժերի վրա՝ ձերբակալում ու կալանավորում զինվորականներին, ամեն գնով վարկաբեկում և անվանարկում ՀՀ Զինված ուժերը։ Այդ փաստերի մասին փաշինյանական վարչախումբը չի հիշի, ձեռնտու չէ։ Փոխարենը պատմությունից դասեր քաղելու, մեղքը նախկինների վրա բարդելու կոչեր կանեն, իսկ երեկոյան կխմեն զինվորի կենացը։
Գևորգ Վարդանյան
