Տարօրինակ վարակումների շարք․ հարսանիքը և իր հետևանքները

Նիկոլ Փաշինյանը կորոնավիրուսի թեստ է հանձնել, որի պատասխանը դրական է եղել։ Հայաստանի կառավարության փոխանցմամբ Փաշինյանը սահմանված կարգով ինքնամեկուսացել է, գործունեությունը կիրականացնի հեռավար, հիվանդությունն ընթանում է անախտանիշ: Նշենք, որ պաշտոնական տեղեկություններով, Նիկոլ Փաշինյանը երկրորդ անգամ է վարակվում, առաջին անգամ նա ու իր ընտանիքի անդամները կորոնավիրուսով վարակվել էին 2020թ.–ի հունիսի 1-ին։ Տարօրինակ կերպով այսօր նաև վարակվելու մասին հայտնել են Գլխավոր շտաբից։ Արտակ Դավթյանի վարակվելու պատճառով հետաձգել են հունվարի 28-ին նախանշված ընդունելությունը, որը պետք է կայանար «Դվին» սրահում։ Կորոնավիրուսով «վարակվածներ» կան նաև «Քաղաքացիական պայմանագիր» խմբակցությունում։ Պատվաստված պաշտոնյաների վարակումների այս շքերթն իսկապես տարօրինակ է։

Եթե Փաշինյանը անախտանիշ է տանում հիվանդությունը, ի՞նչն է նրան ստիպել կրկին թեստ հանձնել։ ԶԼՄ-ները վարկածներ են առաջ քաշում, որ Փաշինյանն այդկերպ ցանկանում է պարզապես խուսափել Բանակի օրվան նվիրված միջոցառումներից։ Մեկ այլ վարկածով էլ խուսափում է կարևոր և ճակատագրական ինչ-որ արտերկրյա այցից։ Բանակի օրվա միջոցառումներին չմասնակցելու վարկածի օգտին է խոսում նաև ԳՇ պետի հանկարծակի վարակման փաստը։ Նիկոլ Փաշինյանը պատերազմից հետո խուսափում է հանրային վայրերից՝ վախենալով, թե կարող է արժանանալ միջոցառման մասնակիցների քննադատությանը կամ թարս հայացքներին։ Փոխարենը ակտիվորեն և հաճույքով մասնակցում է «Քաղաքացիական պայմանագրի» անդամների առիթներին, քեֆ անում, ուրախանում։

Օրեր առաջ էլ Փաշինյանն ու այլ պաշտոնյաներ մասնակցել են Պաշտպանության նախարար Սուրեն Պապիկյանի հարսանյաց արարողությանը։ Չի բացառվում, որ հենց հարսանիքի տեղում էլ վարակվել են։ Թեպետ առողջապահության նախարարությունը պնդում է, թե ստուգել են մասնակիցների պատվաստման թերթիկները, սակայն որևէ ապացույց այդպես էլ չի ներկայացվել։ Իսկ մինչ այդ կորոնավիրուսի «օմիկրոն» տարատեսակը շարունակում է արագորեն տարածվել: Վերջին երկու շաբաթում՝ նախորդ երկու շաբաթվա համեմատ վարակումների թիվն աճել է 400 տոկոսով։

Էդգար Թադևոսյան