Ընդդիմության դեմ հետապնդումները շարունակվելու են նոր թափով

Հայաստանի գործող վարչախմբի թիվ մեկ և կենսական խնդիրը արմատական ընդդիմությանը կոտրելն է։ Փաշինյանական վարչախումբը մտադիր է առաջիկայում նոր թափ հաղորդել ընդդիմության դեմ հետապնդումներին՝ հասկանալով, որ միայն ազդեցիկ և անկոտրում ընդդիմադիրներին մեկուսացնելու շնորհիվ կարող է երկարաձգել իր անփառունակ պաշտոնավարումը։ Ընդ որում, հետապնդումներ են իրականացվելու թե՛ խորհրդարանական ընդդիմության ներկայացուցիչների, թե՛ ՏԻՄ ընդդիմադիր ներկայացուցիչների, բանակի հրամկազմի նախկին ու ներկա ներկայացուցիչների դեմ։

Ազգային անվտանգության ծառայությունը երեկ տեղեկացրեց, որ 2020-ի նոյեմբերի 10-ի գործով ևս 2 անձի՝ «Հայաստան» դաշինքի ակտիվիստ Նարեկ Մանթաշյանի և ոմն Գ․Գ․-ի մասով նախաքննությունն ավարտվել է։ Նրանց մեղադրում են ոչ միայն կառավարության շենքի և Փաշինյանի կեցավայրի վրա հարձակումների, այլև «Զվարթնոց» օդանավակայանում զանգվածային անկարգություններ հրահրելու մեջ։ Ընդհանուր առմամբ, մեղադրանքներ են առաջադրվել 29 անձանց, սակայն Փաշինյանը հրահանգել է այդ թիվն ավելացնել մի քանի անգամ։

Մեր աղբյուրի փոխանցմամբ՝ ոստիկանությանը, ԱԱԾ-ին, այլ կառույցների հրահանգվել է թարմացնել ընդդիմադիր ակտիվիստների ցուցակները, հետևել նրանց տեղաշարժին, հանդիպումներին, սոցցանցային ակտիվությանը, անհրաժեշտ ապացույցներ գտնելու դեպքում ձերբակալել կամ բերման ենթարկել։

Նույն վիճակն է նաև ՀՀ ՊՆ-ում և Գլխավոր շտաբում։ Տակավին օրերս ամուսնացած Սուրեն Պապիկյանին առայժմ հանձնարարվել է հետաձգել մեղրամիսը, լծվել բանակը անցանկալի տարրերից ազատելու գործին։ Բանակը Փաշինյանի նկատմամբ բացասաբար տրամադրված զինվորականներից մաքրելու գործի վերահսկողն էլ ԱԺ Պաշտպանության և անվտանգության հարցերի նախագահ Անդրանիկ Քոչարյանն է՝ իր ընկերոջ՝ Ռազմական ոստիկանության պետ Աշոտ Զաքարյանի հետ։ Նախկին նախարար Արշակ Կարապետյանը ցանկանում էր ազատվել Աշոտ Զաքարյանից, սակայն Անդրանիկ Քոչարյանին հաջողվեց նրան պահել այդ պաշտոնին, իսկ այժմ՝ Սուրեն Պապիկյանի օրոք Զաքարյանը կրկին ձիու վրա է։

Զտումներ են սպասվում նաև պետական գերատեսչություններում։ Քիչ թե շատ ազդեցիկ որևէ պաշտոնի ընդդիմադիր անձի չպետք է թողնեն։ Փաշինյանը թեև կադրային լուրջ պակասուրդ ունի, սակայն մտադիր է թափուր թողնել ցանկացած հաստիք, քան ընդդիմադիրներին թողնել պետական համակարգում։

Սամսոն Առուստամյան