Ընդդիմությունը չի մասնակցի Նիկոլ Փաշինյանի բեմադրած ֆարսերին

Խորհրդարանական ընդդիմությունը՝ ի դեմս «Հայաստան» և «Պատիվ ունեմ» խմբակցությունների, չի մասնակցի ո՛չ նախագահի ընտրությանը, ո՛չ էլ Սահմանադրական փոփոխությունների հանձնաժողովի աշխատանքներին։ Արմեն Սարգսյանի հրաժարականից հետո իշխանական մամուլը տեղեկություններ սկսեց շրջանառել, թե «Հայաստան» դաշինքը կարող է նախագահի պաշտոնի համար առաջադրել Հայաստանի երկրորդ նախագահ Ռոբերտ Քոչարյանի թեկնածությունը։ «Հայաստան» դաշինքն էլ ո՛չ հերքել, ո՛չ հաստատել էր այդ հնարավորությունը, ինչը փաշինյանականներին հույս էր տվել նոր և փնթի բեմադրություն ծրագրել։ Նախագահի պաշտոնում թեկնածու առաջադրելու համար հարկավոր է առնվազն 27 պատգամավորների ստորագրությունը։ Ընդդիմադիր երկու ուժերը կարող էին առաջադրել թեկնածու միայն համատեղ։ Մեր տեղեկություններով՝ երկու ուժերի միջև քննարկումներ են կայացել, որոշվել է թեկնածու չառաջադրել։

 

«Քաղաքացիական պայմանագիրն» ունի բավարար թվով մանդատներ՝ առնվազն երկրորդ փուլով նախագահ ընտրելու համար, իսկ ընդդիմադիր ցանկացած թեկնածու որևէ շանս չուներ։ Ըստ էության, ընդդիմությանը սադրելով՝ թեկնածու առաջադրելու, փաշինյանական վարչախումբը մտադիր էր բուռն գործունեության իմիտացիա ստեղծել, նաև փորձել փչացնել ընդդիմությանը։ Փոխարենը, այժմ ընդդիմադիրները բավական լավ կպատրաստվեն իշխանական թեկնածուի հարցով քննարկումներին, կկարողանան ի ցույց դնել Փաշինյանի ներկայացրած անձի սնանկությունն ու անպատրաստությունը, նախագահական ինստիտուտի նկատմամբ գործող վարչախմբի արհամարհական մոտեցումները։ Ընդդիմադիրները նաև հրաժարվել են մասնակցել Սահմանադրական բարեփոխումների խորհրդի աշխատանքներին։ Երկրում ստեղծված իրավիճակում իշխանությունը գործնականում զբաղված է միայն թամաշաներ կազմակերպելով, և ընդդիմադիր ուժերը ողջամիտ մոտեցում են որդեգրել՝ չմասնակցել այդ բեմադրություններին, այլ օր ու արև չտալ իշխանությանը։ Իհարկե, ընդդիմության աշխատանքն այդ ուղղությամբ, հեռու է բավարար լինելուց։