Որքան երկար է պահպանվում իմունային պատասխանը այն մարդկանց մոտ, ովքեր հիվանդ են եղել Covid-ով
ՀԱՍԱՐԱԿՈՒԹՅՈՒՆ
maximonline.ru-ն գրում է, որ ինչպես գիտենք, կորոնավիրուսի նկատմամբ իմունիտետ կարելի է ձեռք բերել երկու եղանակով՝ պատվաստվելով և հիվանդանալով։ Պատվաստումից հետո կրկնապատվաստում անհրաժեշտ է անցնել վեց ամիս անց: Իսկ որքա՞ն ժամանակ է պահպանվում իմունիտետը հիվանդությունից հետո:
Ավստրալացի գիտնականներն այդ հարցի պատասխանն ունեն: Քիրբիի անվան Բժշկական հետազոտությունների Ավստրալիայի ինստիտուտի գիտնականները հետազոտություն են անցկացրել, որի ընթացքում պարզել են, թե որքան ժամանակ է պահպանվում բորբոքային գործընթացը հիվանդների մոտ՝ խթանելով իմունային համակարգի արձագանքը։ Փորձի համար նրանք նմուշներ են վերցրել 62 չպատվաստված մարդկանցից, որոնց մոտ ախտորոշվել է Covid, և ուշադիր զննել նրանց։ Իսկ արդյունքների մասին կիսվել են իրենց իսկ ինստիտուտի կայքում։
Հետազոտողները պարզել են, որ կորոնավիրուսով չպատվաստված հիվանդների մոտ այսպես կոչված երկարատև կայուն բորբոքումը, որպես իմունային համակարգի պատասխան, պահպանվել է հիվանդության սկզբից առնվազն ութ ամիս:
«Մենք համեմատել ենք հիվանդների տվյալները այն մարդկանց տվյալների հետ, ովքեր չեն ունեցել COVID-19, և հայտնաբերել ենք I և III տիպի ինտերֆերոնների բարձր մակարդակ, որոնք բջիջներն արտադրում են ի պատասխան վիրուսի առկայության։ Այս ինտերֆերոնները սովորաբար անհետանում են վարակն անցնելուց հետո, սակայն երկարատև կորոնավիրուսով հիվանդների մոտ երկար ժամանակ է հայտնաբերել դրանց առկայությունը»,- ասել է ինստիտուտի ավագ գիտաշխատող Չանսավատ Ֆեթսուֆանը: Գիտնականները նաև պարզել են, որ կան երկարատև իմունոլոգիական փոփոխություններ ինչպես հիվանդության ծանր ձևերի դեպքում, այնպես էլ նրանց մոտ, ովքեր ունեցել են կորոնավիրուսի թեթև ձևեր: Երկարատև Covid-ի դեպքում իմունային պատասխանը պահպանվել է նույնիսկ այն բանից հետո, երբ վիրուսը «ամբողջովին լքել է օրգանիզմը»: Միևնույն ժամանակ, գիտնականներն ընդգծել են, որ չի կարելի անլուրջ վերաբերվել կորոնավիրուսին։ Հոդվածում նշվում է, որ երկարատև կորոնավիրուս զարգանում է չպատվաստված հիվանդների գրեթե 30%-ի մոտ։ Ավստրալացի փորձագետները հույս են հայտնել, որ կորոնավիրուսի «ավելի մեղմ» շտամները չեն առաջացնի այդքան ծանր COVID-19-եր, բայց դա հաստատ ասելու համար կպահանջվեն ավելի շատ տվյալներ։
Նյութը հրապարակման պատրաստեց Կամո Խաչիկյանը
