Նիկոլ Փաշինյանի սիրտը ներդաշնակ նախագահ է ուզում

Հայաստանի նախագահ Արմեն Սարգսյանի հրաժարականից հետո անուններ սկսեցին շրջանառվել, թե ովքեր կարող են դառնալ ՀՀ հաջորդ նախագահը։ ԱԺ նախագահ Ալեն Սիմոնյանի կողմից նախագահի հայտարարությունը ընթերցվեց երեկ կայացած նիստում, եթե մեկ շաբաթվա ընթացքում գրավոր դիմումով Արմեն Սարգսյանը հետ չվերցնի հրաժարականի դիմումը, ապա նա պաշտոնանկ կարվի, իսկ 25-35 օրվա ընթացքում իշխող «Քաղաքացիական պայմանագիրը» նոր նախագահ կընտրի։ Կասկած չկա, որ նախագահ է դառնալու հենց այն թեկնածուն, որին էլ կառաջադրեն փաշինյանականները։

Խմբակցությունն ունի 71 պատգամավոր, և առնվազն երկրորդ փուլով հանգիստ կանցկացնի թեկնածուին։ Որպես նախագահի հնարավոր թեկնածուներ շրջանառվում են Էդմոն Մարուքյանի, Արամ Սարգսյանի, Ստեփան Դեմիրճյանի, այլ անձանց անունները, սակայն վարչապետի պաշտոնը զբաղեցնող Նիկոլ Փաշինյանի՝ երեկ կայացած ասուլիսը կարող է սառը ցնցուղ լինել իշխող թիմի անդամ չհանդիսացող գործիչների համար։ Փաշինյանն իր ասուլիսում հայտարարել է, թե չի մեկնաբանում Արմեն Սարգսյանի հրաժարականի պատճառները։ Նա միայն նշել է, թե հայտարարության հրապարակումից 3,5 ժամ առաջ է Սարգսյանը զանգահարել իրեն, տեղեկացրել հրաժարական տալու մտադրության մասին։ Պնդելով, թե գալով իշխանության՝ չի սահմանափակել Արմեն Սարգսյանի լիազորությունները, նա միաժամանակ ակնարկել է, թե ներդաշնակ չի աշխատել հեռացող նախագահի հետ։

Փաշինյանը որևէ թեկնածուի անուն չի տվել, սակայն ընդգծել է, որ նոր նախագահը պետք է ներդաշնակ աշխատի կառավարության և խորհրդարանական մեծամասնության՝ «Քաղաքացիական պայմանագրի» հետ՝ հիշեցնելով, որ Արմեն Սարգսյանը չստորագրեց Գլխավոր շտաբի պետի պաշտոնանկության՝ իր հրամանագիրը, երբ Օնիկ Գասպարյանը պահանջում էր վարչապետի հրաժարականը։

«Այդ ներդաշնակության սակավության պատճառով մենք շատ լուրջ մարտահրավերներ ենք ունեցել, որոնց խորությունը գուցե թե չենք էլ արձանագրել էդ պահին։ Մասնավորապես, նախորդ տարի Գլխավոր շտաբի հայտնի հայտարարության համատեքստում, էստեղ իշխանության խնդիր չէր բացարձակապես, կառավարության խնդիր չէր, գործադիր իշխանության խնդիր չէր, իմ գնահատականն այն է, որ մենք պետականության կորստի եզրին էինք գտնվում այդ ժամանակ», - հայտարարել է Փաշինյանը։

Մեծ հավանականությամբ, իշխող թիմը հենց իր կազմից էլ կառաջադրի թեկնածուի, նրան կդարձնի ժամանակավոր նախագահ, եթե Փաշինյանն ի վերջո կողմնորոշվի պետական կառավարման համակարգը փոխելու հարցում։ Նույնիսկ եթե չփոխի էլ, ՔՊ-ական նախագահը պարզապես Նիկոլ Փաշինյանի ևս մեկ ենթական կլինի՝ անմռունչ կատարելով նրա ցանկացած ապօրինի հրահանգ։

Գևորգ Հովսեփյան