Փաշինյանի «խաղաղության դարաշրջանն» ու դառը իրականությունը

Արցախի գլխավոր դատախազությունը հրապարակել է 2020թ. նոյեմբերի 9-ի եռակողմ հայտարարությունից հետո մինչև այս տարվա սկիզբ Արցախի դեմ ադրբեջանական սադրանքների վիճակագրությունը․ ադրբեջանական զինված ուժերի կողմից արցախահայության նկատմամբ կատարվել է 69 հանցագործություն, որոնց կապակցությամբ հարուցվել է ընդհանուր 54 քրեական գործ: Ընդհանուր առմամբ արձանագրվել է սպանության 5 հանցավոր դեպք (քաղաքացիական անձանց սպանության` 3 դեպք), սպանության փորձի՝ 28 (որից 19-ը` ուղղված զինվորականների դեմ), ահաբեկչական գործողության՝ 1, հրազենի գործադրմամբ գույքի ոչնչացման՝ 16 (որից 10-ը` ռազմական գույքի ոչնչացում կամ վնասում), գույքի ոչնչացման ու վնասման փորձի՝ 5, գողության՝ 3, կողոպուտի՝ 2, գերեզմանները ոչնչացնելու՝ 3, խոշտանգման՝ 4, սպանության սպառնալիք տալու և մարդու առևանգման՝ 1-ական դեպքեր: Սպանվել է 3 քաղաքացիական անձ և 10 զինվորական, սպանության փորձի ենթարկվել 77-ը (50 զինվորական), տարբեր աստիճանի հրազենային վիրավորում է ստացել 37 անձ (28 զինվորական), ֆիզիկական բռնության է ենթարկվել 8-ը, սպանության սպառնալիքի` 2-ը:

Թշնամի պետությունն, իհարկե, նույն ինտենսիվությամբ շարունակում է սադրանքների հրահրումը Արցախի և Հայաստանի սահմաններին։ Գործնականում, Ադրբեջանի ղեկավարությունը հստակ և նպատակամղված քաղաքականություն է իրականացնում՝ հնարավորինս անտանելի դարձնել հայ բնակչության կյանքը, առողջության և կյանքի համար սպառնալիքներ ստեղծելով՝ ստիպել լքել իրենց բնօրրանն ու հեռանալ։ Ադրբեջանը, պարզ ասած, խաղաղության որևէ մտադրություն չունի, և նրա քաղաքականությունն էլ միտված է դրան։ Թշնամին անընդհատ զինվում է, նոր ստորաբաժանումներ ստեղծում, զորամասեր և ենթակառուցվածքներ կառուցում Արցախից զավթած տարածքներում, ամրապնդվում, որպեսզի հետագայում էլ ավելի շատ տարածքներ նվաճի։ Իսկ ի՞նչ է անում Հայաստանի իշխանությունը, որպեսզի պաշտպանի Արցախի բնակչության, Հայաստանի՝ սահմանամերձ դարձած բնակավայրերում ապրողների կյանքը և առողջությունը․ գործնականում ոչինչ։

«Խաղաղության դարաշրջան» հաստատելու փաշինյանական փորձերը նույնիսկ արտերկրում հանդիպում են ծաղրի, սակայն գործող վարչապետը չի ընկճվում, շարունակում է նույն ոգով քծնել Հայաստանն ու Արցախը հոշոտող թշնամուն։ Քանի դեռ Հայաստանում իշխում է փաշինյանական վարչախումբը, Հայաստանի և Արցախի անվտանգությունը միշտ էլ վտանգված է լինելու։

Արամ Սահակյան