Եվրամիության չափանիշներով արդեն կարմիր գոտում ենք
ՀԱՍԱՐԱԿՈՒԹՅՈՒՆ
Վերջին օրերին նկատվում է կորոնավիրուսային հիվանդությամբ վարակվողների թվի կտրուկ աճ։
Այս թեմայի մասին զրուցել ենք ՀՀ ԱՆ հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանի հետ։
Հարցին, թե ինչո՞վ է պայմանավորված այդ աճը՝ համաճարակաբանն ասաց. « Աճը, ըստ երևույթին, պայմանավորված է շրջանառվող «Օմիկրոն» շտամով, որովհետև օրական կտրվածքով աննախադեպ աճ է գրանցվում։ Եթե 14 օրվա ընթացքում արձանագրված դեպքերը համեմատում ենք նախորդ 14 օրվա հետ, ապա նկատելի է, որ 174%-ով դեպքերի աճ կա։ Դրական թեստերի մասնաբաժինը 1,6-ից դարձել է 5,1%, վարակի վերարտադրողական ցուցանիշը բավականին բարձր է, ու մանկապատանեկան տարիքային բոլոր խմբերում ունենք նոր դեպքերի հնգապատիկ աճ։ Շեշտակի աճ ունենք միանշանակ, Եվրամիության չափանիշներով արդեն կարմիր գոտում ենք»։
Անդրադառնալով հարցին, թե «Օմիկրոն» շտամին դիմակայելու համար առողջապահական համակարգն ի՞նչ քայլեր է պատրաստվում անել` համաճարակաբանն ասաց. «Հունվարի 22-ից ուժի մեջ կմտնի նոր սահմանափակումը, որի համաձայն ժամանցի վայրեր կարող են հաճախել միայն նրանք, ովքեր կա՛մ պատվաստված են, կա՛մ ունեն ՊՇՌ թեստի բացասական արդյունք։ Ուսումնասիրվել են նաև աշխարհի փորձն ու այս շտամի շրջանառությունն այլ երկրներում, բնականաբար, գիտեինք, որ Հայաստանում ևս լինելու էին այս շտամով վարակվածության դեպքեր։ Բացի այս նոր սահմանափակումից, արդեն իսկ առկա կանխարգելիչ ու հակահամաճարակային միջոցառումները շարունակում են գործել։ Կախված շտամի վարակելիության բարձր կամ ցածր լինելուց՝ սահմանափակումները համապատասխանաբար խստացվում են կամ մեղմվում»։
Սոնա Գիշյան
