Նիկոլ Փաշինյանը սպառնում է նոր լոքդաուն սկսել

Ժամանակին քաշած օղիով և պինցետով կորոնավիրուս բուժող Նիկոլ Փաշինյանի համար կրկին հրաշալի հնարավորություն է ստեղծվել երկրում կորոնավիրուսով պայմանավորված նոր լոքդաուն հայտարարելու, հանրությանը ահաբեկելու, հանրային առողջությունը վնասելու հարցում։ Առողջապահության նախարար Անահիտ Ավանեսյանը կառավարության նիստում հայտարարել է, թե վարակման թվերն աճում են վիրուսի նոր շտամի՝ «օմիկրոն»-ի պատճառով, բայց պատվաստումների շնորհիվ, ըստ նրա, նվազել են մահերը։ Իշխանությունների ձախողված քաղաքականության, նրանց նկատմամբ տոտալ անվստահության պատճառով Հայաստանում պատվաստվածների թիվը աննախադեպ փոքր է` 26,1 տոկոս, իսկ խթանիչ (բուստեր) ստացել է միայն 0,1 տոկոսը։

Վարչապետի պաշտոնը զբաղեցնող Փաշինյանն անմիջապես արձագանքել է, հայտարարել, թե տեսչական մարմինները պետք է ստուգումները խստացնեն, որ պատվաստման QR կոդ կամ թեստի բացասական պատասխան չունեցող մարդիկ հանրային փակ վայրեր չմտնեն։ Այս նոր խստացումը Հայաստանում ուժի մեջ է մտնում շաբաթ օրը՝ հունվարի 22-ին։

«Ընդ որում՝ պատասխանատվությունը կրում են տնտեսվարողները: Սա արվում է հենց տնտեսվարողների շահերից: Երբ որ մեր հիվանդանոցները լցվեն ամբողջությամբ, մենք ստիպված կլինենք գնալ լոքդաունի», - նշեց վարչապետ Նիկոլ Փաշինյանը:

Նոր սահմանափակումները, իհարկե, լրջորեն հարվածելու են տեղական բիզնեսին, խփելու են ռեստորանային, տուրիզմի և այլ ոլորտներին, բայց այդ հանգամանքը, թերևս, քիչ է հետաքրքրում Նիկոլ Փաշինյանի վարչախմբին։ Պետական մարմինները կա՛մ չունեն համապատասխան ռեսուրսներ՝ սահմանափակումները վերահսկելու համար, կա՛մ էլ պարզապես չեն ցանկանում վերահսկել։ Թիվ մեկ մտահոգությունը, իհարկե, ամեն գնով հանրությանն ահաբեկելն է, խուճապի մատնված երկրի բնակչությանն ավելի հեշտ է վախեցնել, վերահսկել, իշխել։

Նաև կորոնավիրուսն առիթ է՝ պետական գանձարանից ահռելի միջոցներ դուրս գրելու, բնակչությունից էլ ոչ պակաս ահռելի միջոցներ գանձելու համար։ Այլ նպատակներ այս իշխանությունը չի հետապնդում։ Իսկ մինչ այդ, կորոնավիրուսից և ուղեկցող հիվանդություններից զոհերի թիվը մոտենում է ընդհուպ 10 հազարին։

Սարգիս Հայրապետյան