Փաշինյանական իշխանությունը ձեռնասուն ՄԻՊ է ընտրելու

Հայաստանի Ազգային ժողովն այսօր՝ հունվարի 17-ին գումարել է իր հերթական քառօրյա նիստերը։ Օրակարգում ընգրկված 25 հարցերից ամենակարևորը, թերևս, Մարդու իրավունքների նոր պաշտպանի ընտրությունն է։ Գործող օմբուդսմեն Արման Թաթոյանը փետրվարին ավարտում է իր վեցամյա առաքելությունը, օրենքով խորհրդարանը պարտավոր է նոր օմբուդսմեն ընտրել։ Դրա համար նաև օրենքը հստակ սահմանափակումներ և չափորոշիչներ, օմբուդսմեն պիտի ընտրվի մասնագիտական բարձր կարողությունների հանրության մեջ բարձր հեղինակություն ունեցող անձը։

Իշխող «Քաղաքացիական պայմանագիր» կուսակցությունն օմբուդսմենի պաշտոնի համար առաջադրել է արդարադատության փոխնախարար Քրիստինե Գրիգորյանի թեկնածությունը։ Մինչ առաջադրումը ԶԼՄ-ներում տարբեր անուններ էին շրջանառվում, թե ովքեր կարող լինել ՄԻՊ։ Ընդ որում, շրջանառվում էին «Լուսավոր Հայաստան» կուսակցության նախագահ Էդմոն Մարուքյանի, այլ անձանց անուններ, որոնք, անկախ ամեն ինչից, ճանաչելիություն և հեղինակություն ունեն հանրության շրջանում, նաև հայտնի էին որպես լուրջ իրավաբաններ։ Թերևս, լուրջ և կայացած իրավաբանները չեն ցանկացել աշխատել «Քաղաքացիական պայմանագրի» հետ, քանի որ Նիկոլ Փաշինյանի ու նրա վարչախմբի միակ նպատակը ձեռնասուն և ենթարկվող օմբուդսմեն ունենալն է։

Արման Թաթոյանը հատկապես պատերազմից հետո իր գործունեությամբ, սահմանամերձ դարձած գյուղերի բնակիչների իրավունքների պաշտպանությամբ, գործող իշխանությունների ապօրինությունների վերհանմամբ դարձել փաշինյանական վարչախմբի աչքի փուշը։ Եվ այժմ լավ հնարավորություն է ստեղծվել իշխանությունների համար՝ ազատվել Թաթոյանից, նրա փոխարեն նշանակել գեղանի մի տիկնոջ, ով մինչ փոխնախարար դառնալը Արարատ Միրզոյանի օգնական էր աշխատում։ Քրիստինե Գրիգորյանը, անկախ իր մասնագիտական և մարդկային որակներից, լինելու է այս իշխանությունների կամակատարը, այլ ոչ Հայաստանում մարդու իրավունքների համար կռիվ տվող պաշտոնյա։ Սա էլ, ըստ ամենայնի, Փաշինյանի, հիմնական նպատակն է։

Տարոն Գրիգորյան