Փարաքարում իրավիճակը հանգուցալուծվեց «Քաղաքացիական պայմանագրի» ճնշման տակ

Արմավիրի մարզի Փարաքար համայնքում իրավիճակը հանգուցալուծվեց «Քաղաքացիական պայմանագրի» ճնշմամբ, իսկ վարչախումբը ստացավ իր համար լավագույն լուծումը։ Հիշեցնենք, որ առաջատար երկու ուժերը՝ «Դավիթ Մինասյան» դաշինքը և «Ապրելու երկիր» կուսակցությունը հայտարարում էին, թե իրենց թեկնածուն է ընտրվել։ «Ապրելու երկիրը» 10 մանդատ ուներ, «Դավիթ Մինասյան» դաշինքը՝ 6: «Քաղաքացիական պայմանագրի» 5 անդամները հայտարարել էին, թե աջակցում են «Դավիթ Մինասյան» դաշինքին, իսկ «Ապրելու երկիրը» համայնքապետ էր ընտրել Վոլոդյա Գրիգորյանին։ 2021թ. դեկտեմբերի 30-ին վարչական դատարանն անվավեր էր ճանաչել Վոլոդյա Գրիգորյանին համայնքապետ ընտրելու՝ ավագանու որոշումը։ Դրանից հետո ավագանին հունվարի 5-ին դարձյալ նիստ էր հրավիրել, որը չէր կայացել։ Դրանից հետո բողոքի ակցիաներ, անգամ ծեծկռտուքներ եղան, մինչև երեկ կայացած նիստի ընթացքում համայնքի ղեկավար ընտրվեց «Դավիթ Մինասյան» դաշինքի առաջին համար Դավիթ Մինասյանը։

Ավագանու 11 անդամներ, այդ թվում՝ «Քաղաքացիական պայմանագիր» կուսակցության ներկայացուցիչները, կողմ քվեարկեցին Մինասյանի թեկնածությանը։ Ավագանու «Ապրելու երկիր» խմբակցությունը, Վոլոդյա Գրիգորյանի ղեկավարությամբ, հրաժարվել է մասնակցել քվեարկությանը և վայր է դրել մանդատները։ «Դավիթ Մինասյան» դաշինքը և «Քաղաքացիական պայմանագիր» կուսակցությունը համայնքի կառավարումը կիրականացնեն համատեղ ուժերով։ Հետագա 5 տարվա կառավարումը համամասնորեն կիսվելու է Դավիթ Մինասյանի և համայնքապետի ՔՊ թեկնածու Լյուդվիգ Գյուլնազարյանի միջև։ Այսպիսով՝ կլինի համատեղ կառավարում, և առաջիկա 2,5 տարվա ընթացքում համայնքը կղեկավարի Դավիթ Մինասյանը։

1or.am-ն ավելի վաղ հայտնել էր, թե բողոքի ակցիաներն ու թեժ իրավիճակը հրահրում էր հենց ՔՊ-ն, որպեսզի առավելագույնը պոկի Փարաքարի կառավարումից։ Մամուլում լուրեր էին շրջանառվում, որ աշխատանքի և սոցիալական հարցերի նախարար Նարեկ Մկրտչյանն է կանգնած իրավիճակի թեժացման թիկունքում, ցանկանում է հարմար պաշտոն ստանալ իր սանիկի համար։ Գործող վարչախումբը Փարաքար էր գործուղել պատգամավոր Հայկ Սարգսյանին՝ «Շիշ բռնողին», որի աչալուրջ հսկողությամբ էլ անցկացվեցին համայնքապետի ընտրությունները, իսկ ՔՊ-ն կստանա փոխհամայնքապետի պաշտոն առաջիկա 2,5 տարվա, և համայնքապետի պաշտոն՝ հետագա 2,5 տարվա համար։ Արդյունքում, Նիկոլ Փաշինյանի ղեկավարած ուժը, նույնիսկ ամենաքիչ մանդատներով կարողացավ իր ձեռքը վերցնել Փարաքարը՝ կախվածության մեջ գցելով «կոալիցիոն» գործընկերոջը։

Հայկ Սահակյան