Ահաբեկչության վտանգը մեր տարածաշրջանում ավելացել է․ ի՞նչ պետք է անի ՀՀ իշխանությունը

Ղազախստանի իշխանությունները հայտնում են, թե բողոքի ակցիաների ժամանակ ահաբեկչական խմբավորումներ են եղել, որոնց դեմ պայքարելու համար էլ, իբր, ՀԱՊԿ-ն զորախումբ է ուղարկել։ Ղազախստանի Ազգային անվտանգության կոմիտեն հայտարարել է, թե կոմիտեի աշխատակիցներն Ալմաթիի տարածքում վնասազերծել են ծայրահեղականների երկու խումբ, որոնց անդամները մասնակցել են հունվարի 4-8-ը տեղի ունեցած անկարգություններին։ Թե քանի մարդու, կամ ո՞ւմ մասին է խոսքը՝ չի հաղորդվում: Չի բացառվում, որ ՀԱՊԿ զորախումբ ներգրավելու փաստն արդարացնելու համար են նման խոսակցությունները շրջանառվում, թեև բազմաթիվ վերլուծաբաններ նշում են տարածաշրջանում ահաբեկչության վտանգի աճի մասին։ 

44-օրյա պատերազմի ժամանակ Թուրքիան մեծ քանակությամբ ահաբեկիչներ էր տեղափոխել Ադրբեջան, և ոչինչ չի խանգարում այդ երկրին ահաբեկիչների մի խմբաքանակ էլ Ղազախստան առաքելու համար։ Ազգային ժողովի պատգամավոր, անվտանգային հարցերի փորձագետ Տիգրան Աբրահամյանն էլ արձանագրում է, որ ահաբեկչական, արմատական էլեմենտների ակտիվացման և ներթափանցման տիրույթում, ապա ակնհայտ է, որ այդ տեսանկյունից մեր տարածաշրջանը ևս խոցելի է։

«44-օրյա պատերազմին Թուրքիայի ներգրաված ահաբեկչական խմբերի ներկայիս տեղակայման կամ Ադրբեջանում վաղուց բուն դրած տարբեր ծայրահեղական կազմակերպությունների բջիջների վերաբերյալ ամբողջական տեղեկատվություն չկա։ Ներկայումս Հայաստանի ու Արցախի սահմանագծի անվտանգության մակարդակի բարձրացումը, տարբեր նշանակության ստորաբաժանումների՝ մարտունակության համապատասխան վիճակի բերելը կարևոր է ոչ միայն ադրբեջանական զորքերի հնարավոր սահմանախախտումների կամ ագրեսիայի կանխման, այլ ահաբեկչական խմբերի հնարավոր ներթափանցման առումով։ Անկախ իրադրային մեծ թվով հանգամանքների տարբերություններից, Հայաստանը ևս ապահովագրված չէ ահաբեկիչների թիրախ դառնալուց»,- արձանագրել է փորձագետը։

Բնական է, որ ՀԱՊԿ կազմում գործողությանը հայկական զորախմբի մասնակցությունը տարբեր իսլամական կազմավորումների վրդովմունքն է առաջացնելու։ Տակավին երկու օր առաջ ռուսական մամուլում տեղեկություն հայտնվեց ահաբեկչական սպառնալիքի մասին, թե ռումբեր են տեղադրվել Մոսկվայում Հայաստանի դեսպանատանը։ Տեղեկությունը հերքվեց, սակայն նստվածքը կարող է մնալ և վերաճել իրական սպառնալիքի։ Այս առումով, առաջնահերթ է դառնում Հայաստանի հատուկ ծառայությունների դերը։ Տխրահռչակ վարչախմբի գոյությունն ապահովելու, Փաշինյանի ձեռքի խամաճիկը դառնալու փոխարեն՝ ՀՀ ԱԱԾ-ն պարտավոր է միջոցներ ձեռնարկել ՀՀ տարածքը տարաբնույթ սպառնալիքներից պաշտպանելու համար։ 

Մանվել Մաթևոսյան