Հայաստանն Արևմուտքի թիրախում․ ժողովրդավարությո՞ւն, թե՞ անվտանգություն

ՀԱՊԿ կազմում Ղազախստան հայկական դեսանտա-գրոհային զորախումբ ուղարկելու՝ Նիկոլ Փաշինյանի որոշումը բնականաբար պետք է արժանանար Արևմուտքի և նրա քարոզիչների բուռն դժգոհությանը, խնդիրներ հարուցեր Հայաստանի գործող վարչախմբի համար։ ՀԱՊԿ անդամների շարքում Հայաստանը միշտ էլ ավելի լավ համարում է ունեցել Միացյալ Նահանգների և ԵՄ երկրների համար, քան նույն Ռուսաստանը, Ղազախստանը, Բելառուսը։ Հայաստանը միակ երկիրն էր, որին ԱՄՆ նախագահ Ջո Բայդենը դեկտեմբերին հրավիրել էր ժողովրդավարության համաժողովին։ Ղազախստանում ստեղծված իրավիճակն ու ՀԱՊԿ-ի արձագանքը, սակայն, տրամաբանորեն փոխում են ողջ պատկերը։ ԱՄՆ մի ամբողջ շարք պաշտոնյաներ արդեն հայտարարություններ են արել Ղազախստանում ՀԱՊԿ զորախումբ ուղարկելու մասին։ Պետքարտուղար Էնթոնի Բլինքենը նշել է, թե Ղազախստանի իշխանությունները կարող են սեփական ուժերով հաղթահարել անկարգությունները՝ առանց Հավաքական անվտանգության պայմանագրի կազմակերպության ներգրավման։

«Ինչ վերաբերում է ՀԱՊԿ-ին։ Մենք հարցեր ունենք Ղազախստանին շտապ օգնություն ցուցաբերելու մասին խնդրանքի էության վերաբերյալ, թե ինչու է այն առաջադրվել, մենք ձգտում ենք ավելի շատ տեղեկատվություն ստանալ այդ մասին։ Ինձ թվում է, որ Ղազախստանի իշխանություններն ու կառավարությունը, անկասկած, ներուժ ունեն, որը թույլ է տալիս պատշաճ կերպով զբաղվել բողոքների հետ կապված իրադրությամբ, դա անել ցուցարարների իրավունքների պահպանմամբ՝ միաժամանակ պահպանելով օրենքն ու կարգը», - ասել է Բլինկենը։

Սպիտակ տան մամուլի քարտուղար Ջեյն Փսակին էլ նշել է, թե Ամերիկան ուշադիր հետևում է այն հաղորդագրություններին, որ Հավաքական անվտանգության պայմանագրի կազմակերպությունը ուղարկել է իր հավաքական խաղաղապահ ուժերը Ղազախստան:

«Մենք հարցեր ունենք այս խնդրանքի բնույթի վերաբերյալ՝ արդյոք դա օրինական հրավեր էր, թե ոչ: Մենք դա չգիտենք», – ասել է Փսակին:

ՀՀ ԱԺ նախկին պատգամավոր Արման Բաբաջանյանն էլ այսօր է հայտնել, թե ԱՄՆ-ի իշխանությունները ամենաբարձր մակարդակով ուսումնասիրում են ՀԱՊԿ կազմում հայկական դեսանտա-գրոհային զորախմբի անդամների կողմից Ղազախստանի նախագահ Կասիմ Ժոմարտ Տոկաևի՝ «Կրակ բացել առանց զգուշացման» [fire without warning] հրամանի կատարման մեջ հնարավոր մասնակցությունը: Հարցի հրատապությունը փոխանցվել է Վաշինգտոնում հայկական դիվանագիտական ներկայացուցչությանը, պատկան այլ պատասխանատուներին: Ըստ էության, Նիկոլ Փաշինյանը, զորախումբ ուղարկելով Ղազախստան, գիտակցել է, թե ինչ հետևանքներ կարող է ունենալ այդ հանգամանքը Հայաստանի Հանրապետության համար, բայց ժողովրդավարության և անվտանգության միջև ընտրություն է կատարել հօգուտ երկրորդի։

Հայկ Ավետիսյան