Փարաքարում համայնքապետ չեն կարողանում ընտրել․ գործը հասել է ծեծկռտուքի

Արմավիրի մարզի Փարաքար համայնքում այդպես էլ չեն կարողանում համայնքապետ ընտրել։ Երեկ նույնիսկ իրավիճակն այնքան է թեժացել, որ ավագանու անդամներն ու նրանց կողմնակիցները ծեծկռտուք են հրահրել նիստերի դահլիճում․ ոստիկանությունը բերման է ենթարկել 9 անձի։

Հիշեցնենք, որ դեկտեմբերի 5-ին կայացած ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել է 10 մանդատ և 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Թեև 10 ձայնը 50 տոկոսից քիչ է, սակայն «Ապրելու երկիր» կուսակցությունը պնդում է, որ եթե առաջադրված է մեկ թեկնածու, ապա նա կարող է ընտրվել 40+ տոկոս ձայներով: Երեկ էլ «Դավիթ Մինասյան» դաշինքն է փորձել համայնքապետ ընտրել, սակայն ընտրությունը խափանվել է։ Իշխանությունը Փարաքար է գործուղել մի քանի պատգամավորների, որպեսզի վերջիններս տեղում հասկանան, թե ինչ է կատարվում։

Ավելի վաղ 1or.am-ը հայտնել էր, թե երրորդ տեղը գրաված «Քաղաքացիական պայմանագիրը» միացել է «Դավիթ Մինասյան» դաշինքին, ընտրել նրա թեկնածուն, սակայն գործող իշխանության որոշ ներկայացուցիչներ ամեն կերպ նպաստում են իրավիճակի սրմանը։ Փարաքարում բնակվող, սոցիալական հարցերի նախարար Նարեկ Մկրտչյանը, նշենք, այլ ծրագրեր ունի, ըստ մամուլի, ինքն է կանգնած խառնիճաղանջ իրավիճակի թիկունքում, քանի որ իր սանիկին է փորձում համայքնապետ կամ փոխհամայնքապետ դարձնել։

Մեր աղբյուրների փոխանցմամբ` «Քաղաքացիական պայմանագիրը» փորձում է օգտագործել երկու առաջատար ուժերի դիմակայությունը, և իր թեկնածուին պարտադրել համայնքապետի պաշտոնում։ Մինչ վարչական դատարանը դեռ չի սկսել «Ապրելու երկիր» և «Դավիթ Մինասյան» դաշինքների հայցերի քննությունը, ՔՊ-ն հույս ունի համաձայնության գալ որևէ ուժի հետ, պայմանով, որ համայնքապետ դառնա իրենց թեկնածուն։ Ավելին, մեր աղբյուրի փոխանցմամբ, ՔՊ-ն պատրաստ է համայնքապետարանի և վարչական շրջանների ղեկավարների պաշտոնների առյուծի բաժինը թողնել հնարավոր կոալիցիոն գործըկերոջը, միայն թե համայնքապետ լինի ՔՊ-ականը։ Չի բացառվում, որ Փարաքարում ի վերջո հենց նման զարգացում էլ լինի։

Նորայր Պետրոսյան