Ծանր վիրավորանքի հոդվածը մահակ է դարձել Նիկոլ Փաշինյանի ձեռքին

Քրեական օրենսգրքում ծանր վիրավորանքի հոդվածը վերածվել է պաշտոնյաներին ու քաղաքական գործիչներին քաղաքացիներից անթույլատրելի պաշտպանության տակ առնող հոդվածի` այն էլ ծանրացնող հանցակազմով: Այս մասին նշել է Մարդու իրավունքների պաշտպան Արման Թաթոյանը, արձանագրելով, որ Քրեական օրենսգրքում ծանր վիրավորանքի հոդվածը և պրակտիկան չափազանց մտահոգիչ են, չնայած նրան, որ մարդուն հայհոյելը կամ վիրավորելն իր համար որևէ պարագայում ընդունելի չէ: Ըստ ՄԻՊ-ի՝ բազմիցս է զգուշացրել, որ չի կարելի նման հոդված ընդունել, որ պայքարի սխալ տարբերակ է ընտրված, որ նոր խնդիրներ են առաջ գալու:

«Կառավարության պաշտոնական ներկայացուցիչն ու հոդվածի օգտին հանդես եկող պատգամավորներն իրենք անգամ ԱԺ-ում չէին կարողանում բացատրել, թե ինչ են նշանակում հոդվածի ձևակերպումները»,- նշել է Թաթոյանն ու ընդգծել, թե Քրեական օրենսգրքի այս հոդվածը խիստ վտանգավոր է անձնական ազատության իրավունքի համար: Մասնավորապես, թեև հոդվածի որևէ մաս առհասարակ չի նախատեսում ազատազրկումը` որպես պատիժ ու, հետևաբար, մարդուն կալանավորել (խափանման միջոց) չի կարելի, եզակի չեն դեպքերը, երբ, օրինակ, մարդիկ են ձերբակալվում: Արման Թաթոյանը դեռ հոկտեմբերին էր դիմել Սահմանադրական դատարան ու միջնորդել էր կասեցնել հոդվածի գործողությունը, բայց ՍԴ-ն չկասեցրեց։

Այժմ էլ Թաթոյանը լրացուցիչ հիմքեր է հավաքում, որ կրկին դիմի ՍԴ։ Այս արձանագրումներն, ի դեպ, միայն Թաթոյանը չէր, որ անում էր։ Բազմաթիվ իրավաբաններ, քաղաքագետներ նշում էին, որ Նիկոլ Փաշինյանն ու իր թիմը նոր մահակ են ստեղծում՝ քննադատների բերանը փակելու համար։ Եվ արդյունքում զանգվածաբար խախտվելու են այն մարդկանց իրավունքները, ովքեր փոքր-ինչ էմոցիոնալ են արտահայտում իրենց վերաբերմունքը պատերազմում տանուլ տված և ապիկար վարչախմբի մասին։

Ռոման Հակոբյան