Փարաքարում կրկին թեժ է․ երրորդ տեղում հայտնված ՔՊ-ն խառնում է բոլորին

Արմավիրի մարզի Փարաքար համայնքում այդպես էլ չեն կարողանում լուծել համայնքապետի խնդիրը։ Ի տարբերություն այլ համայնքների, Փարաքարում տարօրինակ իրավիճակ է ստեղծվել։ Հիշեցնենք, որ դեկտեմբերի 5-ին կայացած ՏԻՄ ընտրությունների արդյունքում Փարաքար համայնքում «Ապրելու երկիր» կուսակցությունը 21 հոգանոց ավագանիում ստացել է 10 մանդատ և 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Թեև 10 ձայնը 50 տոկոսից քիչ է, սակայն «Ապրելու երկիր» կուսակցությունը պնդում է, որ եթե առաջադրված է մեկ թեկնածու, ապա նա կարող է ընտրվել 40+ տոկոս ձայներով: Դրանից հետո եկել էին ավագանու մնացած 11 անդամները և 11 ձայնով համայնքապետ էր ընտրվել Դավիթ Մինասյանը, որը «Դավիթ Մինասյան» դաշինքի թեկնածուն է: Նրան էին ընտրել նաև ՔՊ-ի անդամները: «Քաղաքացիական պայմանագիրը», ի դեպ, այս համայնքում միայն երրորդն է, և հենց նրանց ձայներից է կախված, թե ով կդառնա համայնքապետ։ Թեև անվանապես ՔՊ-ն պաշտպանում է «Դավիթ Մինասյան» դաշինքի թեկնածուին, սակայն մամուլում անընդհատ լուրեր են շրջանառվում, որ ՔՊ-ն դեմ չէ համագործակցել «Ապրելու երկիր» կուսակցության հետ, եթե իրենց զգալի բոնուսներ տրվեն՝ փոխհամայնքապետի և բաժնի պետերի պաշտոնների տեսքով։ Ընդ որում, լուրեր են շրջանառվում, որ Փարաքարում իրավիճակը թեժացնում է այդ գյուղի բնակիչ, սոցիալական հարցերի նախարար Նարեկ Մկրտչյանը, ով փոխհամայնքապետի պաշտոն է խոստացել իր սանիկին՝ ՔՊ թեկնածուին։

Ի դեպ, մեր տեղեկություններով, «Ապրելու երկիր» կուսակցությունն ու «Դավիթ Մինասյան» դաշինքը փորձել են փոխհամաձայնության գալ և քաղաքական մեթոդներով կարգավորել խնդիրը, սակայն այդ փորձն էլ ձախողվել է «Քաղաքացիական պայմանագրի» միջամտությամբ։ Թեև առաջատար երկու ուժերը դիմել են դատարան՝ հարցին իրավական կարգավորում տալու համար, այսօր ևս ավագանու նիստը սկսվել է միջադեպով։ Համայնքապետարանի բակում հավաքվել էին «Ապրելու երկիր» կուսակցության թեկնածուի աջակիցները և փորձեցին ներխուժել համայնքապետարանի շենք, ինչը թույլ չտվեցին ոստիկանները: Ոստիկանների և քաղաքացիների միջև բախում տեղի ունեցավ: Բախումների արդյունքում տուժել է 1 ոստիկան և 1 քաղաքացի:

Մանվել Սարգսյան