«Քաղաքացիական պայմանագիրը» ձախողեց Վարդենիսում ծրագրած հեղաշրջումը

Ուղիղ մեկ ամիս առաջ տեղի ունեցած ՏԻՄ ընտրությունները դեռ վերջնականապես չեն ավարտվել, մի շարք համայնքներում «Քաղաքացիական պայմանագիրը» չի համակերպվում ընտրությունների արդյունքների հետ, փորձում է սրբագրել դրանք և հարմարեցնել իր քիմքին։ Գեղարքունիքի մարզի Վարդենիս քաղաքում երեք ուժ է հաղթել՝ «Քաղաքացիական պայմանագիրն» ավագանու կազմում 13 մանդատ ունի, «Ահարոն Խաչատրյան» դաշինքը՝ 10, «Միասնական Վարդենիսը»՝ 4: Վերջին երկու ուժերը կոալիցիոն հուշագիր են ստորագրել ու ավագանու 14 հոգանոց կազմով նախորդ տարվա վերջին ընտրել քաղաքապետի իրենց թեկնածուին՝ Ահարոն Խաչատրյանին:

«Քաղաքացիական պայմանագիրն», օգտվելով երկրի քաղաքական իշխանության աջակցությունից և ոստիկանության ռեպրեսիվ օժանդակությունից, փորձում է խմբագրել համայնքի էլեկտորալ տրամադրությունները։ Կոալիցիա կազմած ուժերին փորձում են ահաբեկել ոստիկանական մեթոդներով, մի քանիսին բերման են ենթարկել, օրեր շարունակ կաթվածահար արել համայնքապետարանի աշխատանքը։ Քաղաքապետ ընտրված Ահարոն Խաչատրյանը երեկ երդում է տվել համայնքապետարանի բակում։ «Քաղաքացիական պայմանագրի» թեկնածու, արդեն նախկին քաղաքապետ Արամ Մելքոնյանն էր հրահանգել նոր քաղաքապետին ներս չթողնել վարչական շենք։ ՔՊ-ն հայտարարում է, թե ամենաշատ ձայներն իրենք են ստացել, իրենք էլ պիտի քաղաքապետ ընտրեն։ Այլ հարց, որ այլ համայնքներում, որտեղ հակառակ պատկերն է եղել, «Քաղաքացիական պայմանագիրը» հակառակ սկզբունքներն է առաջ քաշում։ Կարող է առնվազն տարօրինակ թվալ իշխող ուժի այս վարքագիծը, չէ՞ որ երկու դաշինքներն ամեն դեպքում մեկ մանդատ ավելին ունեն։

Բանն այն է, որ ոստիկանության օգնությամբ գործող վարչախումբը ցանկանում է ահաբեկումների կամ այլ եղանակով իրենց կողմը քաշել ավագանու որևէ անդամի, այդկերպ գրավել համայնքապետի աթոռը։ Նման եղանակով, օրինակ, հաջողվեց իշխանազավթում իրականացնել Թալինում։ Վարդենիսում, թերևս, չկան քրեական հեղինակություններ, որոնք կարող էին ազդել ավագանու այս կամ այն անդամի վրա, ուստի և «Քաղաքացիական պայմանագրին» մնում էր վարչական շենքը գրավելով կանխել երդմնակալության արարողությունը։ Ինչևէ, ևս մեկ համայնքում փաշինյանական կոհորտան պարտություն կրեց։ Թեև, չի հանգստանալու, և շարունակելու են նորանոր մեթոդներով ազդել տարբեր համայնքներում ավագանու անդամ դարձած անձանց վրա։ Ահա սա է Նիկոլ Փաշինյանի պատկերացրած ժողովրդավարությունը, արդար և թափանցիկ ընտրությունները։

Տիգրան Հայրապետյան