Դավիթ Տոնոյանի նախազգուշացումը Նիկոլ Փաշինյանին

Պաշտպանության նախկին նախարար Դավիթ Տոնոյանը շատ համառն է, բոլորովին չի ցանկանում քավության նոխազ դառնալ Նիկոլ Փաշինյանի համար, իր վրա վերցնել պատերազմում պարտության ողջ մեղքը՝ Հայաստանի Հանրապետության վարչապետի պաշտոնը զավթած Նիկոլ Փաշինյանին ազատելով ևս մեկ գլխացավանքից։ Ավելին, նույնիսկ անակնկալներ է խոստանում Փաշինյանին։ Օրերս Տոնոյանը հարցազրույց է տվել, որտեղ բառացի նախազգուշացրել է Նիկոլ Փաշինյանին։

««Քավության նոխազ» գտնելու տեսանելի ցանկությունն, այսպես ասած, սավառնում է քաղաքական դաշտում, բայց, կարծում եմ, այս առումով լինելու են անակնկալներ։ Մի բան հստակ է, որ գործ ունենք ինձ և պաշտպանական համակարգը վարկաբեկելու մոլեռանդ ցանկության հետ»,- նշել է Տոնոյանը։

Նրան կալանավորելուց հետո Տոնոյանի փաստաբանական թիմը մի քանի նման զգուշացումներ է արել, վկայակոչել քաղաքական զսպվածության հանգամանքը, նաև փաստարկել, որ նախաքննական մարմնին այդպես էլ չի հաջողվել որևէ ապացույց գտնել անորակ հրթիռներ գնելու մեջ նախկին նախարարին, զենքի մատակարար Դավիթ Գալստյանին՝ «Պատրոն Դավոյին», և այլ զինվորականների մեղադրանք առաջադրելու համար։

«Մինչ այս պահը ես զսպվածություն եմ պահպանել քաղաքական գործընթացներում ներգրավվելու առումով, և դրա մասին է եղել իմ փաստաբանների հայտարարությունը։ Դեռևս առիթներ կլինեն հանրությանը ներկայացնելու իմ պարզաբանումները 44-օրյա պատերազմի վերաբերյալ՝ ստեղծվելիք քննիչ հանձնաժողովների միջոցով, իհարկե, եթե ապահովվի վերջինիս աշխատանքի օբյեկտիվությունն ու անկողմնակալությունը»,- նույն այդ հարցազրույցում նշել է Տոնոյանը։

Դե չի ուզում նախկին նախարարը դառնալ քավության նոխազ, ինչպես և նույն գործով մյուս մեղադրյալները։

«Ինչպես ասել եմ դեռևս 2020թ. նոյեմբերի 20-ի իմ ուղերձում, պատրաստ եմ կրել իմ բաժին պատասխանատվությունը: Բայց միայն իմ արածի և ոչ թե չարածի համար»,- նշում է Տոնոյանը։

Իսկ Փաշինյանն ամեն ինչ անում է, որպեսզի Տոնոյանը, Գալստյանը, մյուսները պատասխանատվություն կրեն ոչ միայն իրենց արածի և չարածի, այլև հենց իր՝ պատերազմի ժամանակ գլխավոր հրամանատարի փոխարեն։ Բազմիցս ենք արձանագրել, որ քրեական այս գործը արդեն իսկ փլուզված է, իսկ դատարանում ընդհանրապես փաշինյանական չարդարադատության համակարգը խայտառակ պարտություն է կրելու։ Իսկ Դավիթ Տոնոյանը զգալի գաղտնի և կարևոր տեղեկությունների է տիրապետում, որոնք ինչ-որ պահի դառնալու են հանրության սեփականությունը՝ տխուր օրեր ապահովելով Նիկոլ Փաշինյանի և նրա կամակատարների համար։

Նարեկ Պետրոսյան