Ի՞նչ է սպասվում Սանկտ Պետերբուրգում․ Փաշինյանը մեկնել է Ռուսաստան

Վարչապետի պաշտոնը զբաղեցնող Նիկոլ Փաշինյանն այսօր աշխատանքային այցով մեկնել է Ռուսաստան, Սանկտ Պետերբուրգում նա կմասնակցի ԱՊՀ մասնակից պետությունների ղեկավարների ոչ պաշտոնական հանդիպմանը: ԱՊՀ-ին անդամակցում են նախկին խորհրդային հանրապետությունները՝ բացառությամբ Բալթյան երեք երկրների: Ադրբեջանը ևս ԱՊՀ անդամ է, և այսօր Սանկտ Պետերբուրգում կարող է հանդիպում տեղի ունենալ Հայաստանի և Ադրբեջանի ղեկավարների միջև:

Փաշինյանի և Ալիևի վերջին երկու հանդիպումը, եռակողմ ձևաչափով, տեղի է ունեցել դեկտեմբերի 14-ին և 15-ին Արևելյան գործընկերության գագաթնաժողովի շրջանակներում՝ նախ Եվրոպական խորհրդի նախագահ Շառլ Միշելի, ապա Ֆրանսիայի նախագահ Էմանուել Մակրոնի մասնակցությամբ: Ավելի վաղ Փաշինյանն ու Ալիևը Ռուսաստանի նախագահ Վլադիմիր Պուտինի միջնորդությամբ և մասնակցությամբ հանդիպել են Մոսկվայում հունվարի 11-ին, ապա նոյեմբերի 26-ին Սոչիում: Մի քանի օր առաջ տված ասուլիսում Փաշինյանը հայտարարել է, թե Սանկտ Պետերբուրգում պաշտոնական երկկողմ հանդիպման առաջարկ չկա, բայց անպայման կլինի շփում Ադրբեջանի նախագահի հետ։

Քաղաքագետները, սակայն, վստահ են, որ ԱՊՀ երկրների ոչ ֆորմալ հավաքին Ռուսաստանի Դաշնությունը նոր փաստաթուղթ է առաջարկելու։ Այդ մասին քաղաքագետ Ստեփան Գրիգորյանն է ասել։ Նշենք, որ նման փաստաթղթերը հանպատրաստից և հանկարծակի չեն ներկայացնում, դրանց նախնական բովանդակությանը կողմերը վաղօրոք են ծանոթացած լինում։ Եվ եթե իսկապես Ռուսաստանը նոր փաստաթուղթ ներկայացնի, կստացվի, որ Նիկոլ Փաշինյանը հերթական անգամ ստել է։ Թերևս, այդ փաստն այլևս չի հուզում հայ հանրությանը, որը սովոր է, որ վարչապետի պաշտոնը զբաղեցնող անձը ստում է առանց արգելակների, իսկ պետության համար առանցքային նշանակություն ունեցող հարցերին ու հանգամանքներին Հայաստանում տեղեկանում են պոստ-ֆակտում, երբ այլևս իրողություններն անշրջելի են դարձել։ 

Արթուր Թորոսյան