Նիկոլ Փաշինյանն ավելի շատ ցանկանում է բանակցային գործընթացն աղավաղել
ՔԱՂԱՔԱԿԱՆՈՒԹՅՈՒՆ
Դեկտեմբերի 24-ին Նիկոլ Փաշինյանը առցանց ասուլիսով հանդես եկավ, որի ժամանակ նա անդրադարձավ Արցախի բանակցային գործընթացին, վերջերս Սյունիքի մարզում գերեվարված երկու ադրբեջանցի զինվորներին առանց նախապայմանների Ադրբեջանին վերադարձնելուն, ինչպես նաև բարձրաձայնեց ու պաշտպանեց ԼՂԻՄ-ում ապրող ադրբեջանցիների շահերն ու իրավունքները։
Անդրադառնալով բանակցային գործընթացներին` վարչապետն ասաց, որ բանակցային գործընթացում ոչ մի իշխանության ու բանակցողի կողմից երբեք չի վիճարկվել ԼՂ-ում ապրած ադրբեջանցիների իրավունքների հարցը։ 2 ադրբեջանցի գերիներին էլ Ադրբեջանին վերադարձնելու վերաբերյալ ասաց, թե առանց նախապայմանների են նրանց վերադարձրել, քանի որ չեն ուզեցել տպավորություն ստեղծել, թե մարդկանց սակարկություններով են զբաղված։
Այս թեմայի շուրջ զրուցել ենք ադրբեջանագետ Գառնիկ Դավթյանի հետ։
Հարցին, թե ինչպես է ադրբեջանագետը գնահատում վարչապետի ասուլիսը` Գառնիկ Դավթյանն ասաց․ «Նիկոլ Փաշինյանի ելույթում ես տեսնում եմ այն ենթատեքստը, որ Նիկոլ Փաշինյանն ավելի շատ ցանկանում է բանակցային գործընթացն աղավաղել և ընդհանուր հայկական շահից չխոսել։ Նիկոլ Փաշինյանն իր պատասխաններում ուղղակի ներկայացնում էր կտրված հատվածներ՝ թիրախավորելով նախկին իշխանությունների վարած արտաքին քաղաքականությունը, մասնավորապես՝ բանակցային գործընթացում։ Այստեղ վտանգավորն այն է, որ նախ՝ ըստ Նիկոլ Փաշինյանի ներկայացրածի, տպավորություն է ստեղծվում, որ, օրինակ, Ստեփանակերտում ու Շուշիում հավասարաչափ կամ ըստ նրա, ավելի շատ Ադրբեջանի քաղաքացիներ են ապրել, քան հայեր։ Սակայն իրականում, մարդահամարի տվյալներով՝ այդպես չէ։ Այդ նույն տրամաբանությամբ, Նիկոլ Փաշինյանը պետք է նշեր, որ Բաքվում ու Սումգայիթում էլ են հայեր ապրել, և ԼՂ հակամարտության հետևանքով, ինչպես ադրբեջանցիներն են դուրս եկել Ստեփանակերտից և այլ վայրերից, այնպես էլ հայերն են դուրս եկել Բաքվից, Սումգայիթից։ Նիկոլ Փաշինյանի հայտարարությունից տպավորությունն այն է, որ առաջնահերթ պետք է դրվի ադրբեջանցիների շահը»։
Սոնա Գիշյան
