Թարս աճած երկնիշ թվերը․ իշխանությանը բարդ օրեր են սպասվում

Հայաստանի էկոնոմիկայի նախարար Վահան Քերոբյանին բարդ օրեր են սպասվում․ լրագրողների հետ ցանկացած հանդիպում ավարտվելու է նրա անցյալի հիշեցմամբ։ Էկոնոմիկայի նախարարը, նշենք, խոստացել էր հրաժարական ներկայացնել, եթե Հայաստանը տարին չամփոփի երկնիշ տնտեսական աճով։ Քերոբյանը, իհարկե, հընթացս փորձեց սրբագրել իր հայտարարությունները՝ ջղաձիգ հայտարարություններով խուսափելով պաշտոնանկության հեռանկարից, սակայն անօգուտ։ Մի հարցում, սակայն, Վահան Քերոբյանը կարող է գլուխ գովել, անցած ամիս սննդամթերքի գները Հայաստանում աճել են 17.4%-ով` նախորդ տարվա նույն ժամանակահատվածի համեմատ, ինչը թանկացման ամենաբարձր ցուցանիշն է այս տարվա ընթացքում։

Վիճակագրական կոմիտեի վերջին տվյալներով, հուլիսից այս կողմ սնունդը թանկացել է երկնիշ ցուցանիշներով։ Ձուն թանկացել է ավելի քան 26%-ով, շաքարը՝ ավելի քան 20%-ով, կարագի, կաթնամթերքի ու հացի գները ավելացել են մոտ 14%-ով, մսինը` շուրջ 10: Միջին աշխատավարձը, մինչդեռ, պաշտոնական տվյալներով, հոկտեմբերին՝ նախորդ հոկտեմբերի համեմատ բարձրացել է ընդամենը 10%-ով և կազմել գրեթե 200 հազար դրամ:

Իհարկե, էկոնոմիկայի նախարարի համար բարդ է լինելու դա որպես ձեռքբերում ներկայացնել, բայց մենք վստահ ենք նրա ուժերի վրա։ Հայաստանի Կենտրոնական բանկը կանխատեսում է, որ տնտեսական աճը կկազմի ընդամենը 4,2 տոկոս, իսկ տարեկան գնաճը՝ 8,4 տոկոս։ Ըստ էության, Հայաստանի բնակիչները դրական որևէ փոփոխություն չեն տեսնելու իրենց կյանքում, ընդհակառակը 27 տոկոս աղքատություն ունեցող երկրում սրվելու են սոցիալական խնդիրները։ Երկնի աճ գրանցելու ճանապարհին են նաև կոմունալ վճարները, և սա լրջագույն ցնցումների կարող է հանգեցնել մի հասարակության մեջ, որտեղ ոտքի կարող են կանգնել հոսանքի թանկացման, բայց ոչ երկրի անվտանգության համար։ Ասել, թե այս երկնիշ թանկացումները չեն հարուցում փաշինյանական իշխանության մտահոգությունը, սուտ կլինի։ Նրանք հրաշալի հասկանում են, թե ինչ հետևանքներ կարող է ունենալ սոցիալական բունտը, սակայն դրա դեմն առնելու փոխարեն զբաղված են պետական գանձարանը հնարավորինս արագ յուրացնելու քայլերով։ Ի վերջո, այդ իշխանության բարձրաստիճան ներկայացուցիչներն էլ հասկանում են, որ այս տեմպերով երկար չեն ձգելու։

Կառլեն Գրիգորյան