Պետք է կարողանանք ներկուսակցական խնդիրները ստորադասել համայնքի շահից
ՔԱՂԱՔԱԿԱՆՈՒԹՅՈՒՆ
Ավագանու արտահերթ նիստի շրջանակներում անցկացված փակ, գաղտնի քվեարկության՝ կողմ 44, դեմ՝ 10, արդյունքներով երկու օր առաջ պաշտոնանկ արվեց Երևանի արդեն նախկին քաղաքապետ Հայկ Մարությանը:
Այս թեմայի մասին 1or.am կայքը զրուցել է փաստաբան Սերգեյ Ամիրխանյանի հետ։
Հարցին, թե փաստաբանն ինչպե՞ս է բնորոշում տեղի ունեցածը` Սերգեյ Ամիրխանյանն ասաց․ «Իրավական տեսանկյունից կարծում եմ, որ «Իմ քայլը» խմբակցությունն ուներ իրավունք նման գործընթաց սկսելու և մարդիկ գտել են, որ պաշտոնանկ անելու ժամանակը հասունացել է։ Որպես կողքից նայող մարդ կարող եմ ասել, որ այն ինչ տեղի է ունենում վերջին շրջանում հաճելի չի, հատկապես այն առումով, որ ի վերջո կարծում եմ երևանցիները այդպես էլ չհասկացան, թե ինչու տեղի ունեցավ այդ ամենը և ինչու անվստահություն հայտնելու իրավիճակ ստեղծվեց։ Այն բոլոր պատճառաբանությունները, որոնք ասեցին իմքայլականները ինձ համար համոզիչ չէին։ Որովհետև այդ բոլոր փաստարկները ավելի շատ նման էին արդարացումների և տպավորություն էր, թե դրանցող «Իմ քայլը» փորձում է թոզ փչել մարդկանց աչքերին, քանի որ այդ բոլոր պատճառաբանությունները, որոնք բերվել էին խմբակցության կողմից, արդեն երեք տարի է ընդդիմադիր խմբակցությունները ասում էին։ Այդ նույն մարդիկ, որոնք անվստահություն հայտնեցին ժամանակին հերքում էին իրենց փաստերը` ասելով, որ նման բան չկա։ Իսկ հիմա ասում են, որ քաղաքապետը լավ չի աշխատել և իր խոստումները չի կատարել և այն մնացած «հեքիաթները», որ «Իմ քայլից» չի և այլ խմբակցությունից է, առհասարակ նորմալ չեմ համարում, քանի որ արդեն նախկին քաղաքապետը վաղուց էր դուրս եկել այդ խմբակցությունից և բացի այդ պետք է կարողանանք հասնել այն մակարդակին, որ այդ ներկուսակցական խնդիրները ստորադասենք համայնքի շահից։ Եվ եթե իրական պատճառը այն էր, որ նախկին քաղաքապետը արդեն իրենց խմբակցության անդամ չի և իրենց հանձնարարությունները չի կատարել այդ պատճառով են անվստահություն հայտնել, դա նորմալ չի։ Եթե «Իմ քայլը» նախկին երեք տարիներին ասում էր, որ աշխատում է, իսկ հիմա վերջին երկու շաբաթում ասել, որ խոստումները չի կատարել, կարծում եմ, նորմալ չի»։
Սոնա Գիշյան
