Վիշապի վերափոխումը. Նիկոլ Փաշինյանը արագացված տեմպերով վերաձևում է Հայաստանի օրենսդրությունը
ՀԱՍԱՐԱԿՈՒԹՅՈՒՆ
tsargrad.tv–ն գրում է, որ Հայաստանում ընդդիմության դեմ քաղաքական բռնաճնշումները շարունակվում են. իշխանությունները ՏԻՄ ընտրություններում հաղթած թեկնածուների հետ վարվելու նոր ձևեր են մտածում:
Հայաստանում ընդդիմադիր դաշինքների ու կուսակցությունների ներկայացուցիչների զանգվածային ձերբակալություններն ու կալանավորումները սովորական են դարձել։ Սակայն ինչքան գնում, այնքան այդ երևույթը մտահոգիչ է դառնում ու դուրս է գալիս քաղաքական պայքարի շրջանակներից։
Կալանավորված են ժողովրդի ընտրված ներկայացուցիչներ՝ Վանաձորի նախկին քաղաքապետ Մամիկոն Ասլանյանը և Վարդենիսի ընտրություններում հաղթած Արամ Հարությունյանը։ Երկու կալանավորված ընդդիմադիրներն էլ հայտարարում են, որ իրենց ձերբակալությունները մեկ նպատակ են հետապնդում՝ թույլ չտալ իրենց մասնակցել ավագանու առաջին նիստերին, որի դեպքում ձայները կբաշխվեն այնպես, որ և՛ Արամ Հարությունյանը, և՛ Մամիկոն Ասլանյանը չեն կարողանա ընտրվել համայնքների ղեկավարներ։
Հայաստանի իշխանությունները նաև հապճեպ սկսել են մշակել նոր օրենքներ, որոնց համաձայն նրանք իրավունք ունեն իրենց կամակատարներին նշանակել ցանկացած վայրում և ցանկացած ձևով։ «Տեղական ինքնակառավարման մասին» օրենքի 27-րդ հոդվածի առաջին մասը լրացվել է դրույթով, ըստ որի ընտրված համայնքների ղեկավարների լիազորությունները դադարելու դեպքում երկրի վարչապետն իրավունք ունի նշանակել իր թեկնածուին համայնքի ղեկավարի պաշտոնակատար: Փորձագետները նշում են, որ այդ փոփոխությունն առաջին հերթին ուղղված է Գորիսի ընտրված, բայց կալանավորված քաղաքապետ Առուշ Առուշանյանի դեմ, ով ընտրություններում հաղթել է իշխանության ներկայացուցչին։
Ընտրողների դժգոհությունն աճում է և սպառնում է դուրս հորդալ փողոց, որը կարող է քշել տանել Փաշինյանին։ Դառը զավեշտն այն է, որ հենց փողոցի շնորհիվ է նա եկել իշխանության։ Վիշապի մասին լեգենդում ոչ ոք չի կարող հաղթել վիշապին, քանի որ հաղթանակից հետո նա ինքն է դառնում վիշապ։ Հավանաբար մեր աչքի առաջ հենց այդ վիշապի ձևավորումն է տեղի ունենում։ Ընդ որում գեղջուկ վիշապի:
Նյութը հրապարակման պատրաստեց Կամո Խաչիկյանը
