Փաշինյանական կոհորտան մնացել է լուսանցքում, բայց շարունակում է ձգձգել պատերազմի հետաքննությունը
ՎԵՐԼՈՒԾՈՒԹՅՈՒՆՆԵՐ
Հայաստանի Ազգային ժողովի «Քաղաքացիական պայմանագիր» խմբակցությունը ամեն գնով փորձում է ձգձգել 44-օրա պատերազմի հանգամանքների հետաքննությունը։ Նշենք, որ 15 անգամ Արթուր Ղազինյանի թեկնածությունը չընդունելուց հետո «Հայաստան» ընդդիմադիր խմբակցությունն այլևս թեկնածու չի առաջադրում, իշխանականներին թողել է տվայտվելու «հպարտ» մենության մեջ։ Նախորդ նիստին հանձնաժողովի նախագահ Անդրանիկ Քոչարյանը հայտարարեց, թե նախագահի տեղակալ առաջադրելու իրավասությունն անցել է «Քաղաքացիական պայմանագրին»։
Ինչպես և սպասելի էր, ՔՊ-ն այսօր թեկնածու չէր առաջադրել։ Քոչարյանն իրենց այս վարքը փորձեց պարզաբանել բարի կամքով։
«Բայց մենք բարի կամքի դրսևորում ցուցաբերեցինք կամ ինչպես ուզում են թող հասկանան, հայտարարեցի, որ «Հայաստան» խմբակցությունը կարող է սկսել խորհրդատվություն իրականացնել «Քաղաքացիական պայմանագիր» խմբակցության ղեկավարության հետ, որովհետև մենք պատրաստ ենք նաև իրենց փոխարեն մեզ անցած տեղը իրենց թեկնածուի քննարկում կազմակերպել: Քանի որ այդ առաջարկը մնաց առկախված, այսօր նորից մեկ անգամ հիշեցնում եմ, որ «Քաղաքացիական պայմանագիր» խմբակցությունը չի ներկայացրել իրեն անցած տեղի համար թեկնածություն, որպեսզի նորից հնարավորություն տանք «Հայաստան» խմբակցության ղեկավարությանը կոնսենսուսի գալ «Քաղաքացիական պայմանագիր» խմբակցության ղեկավարության հետ: Եթե դա չլինի, կարծում եմ և համոզված եմ, որ հաջորդ մեր արտահերթ նիստի ժամանակ «Քաղաքացիական պայմանագիր» խմբակցությունը կներկայացնի մեր խմբակցությունից հանձնաժողովի նախագահի տեղակալի թեկնածություն»,- ասաց Անդրանիկ Քոչարյանը:
Ըստ երևույթին, հաջորդ շաբաթ ևս հանձնաժողովի նախագահի տեղակալ չի ընտրվի որևէ խմբակցությունից, լավագույն դեպքում միայն Ամանորից հետո հանձնաժողովի փոխնախագահ կընտրեն, իսկ փաշինյանական իշխանությունը կրկին ժամանակ կշահի պատերազմի հանգամանքների հետաքննությունը ձգձգելու համար։ Արթուր Ղազինյանը, ի դեպ, անդրադարձել է ստեղծված իրավիճակին, արձանագրել ԱԺ «Քաղաքացիական պայմանագիր» խմբակցության կատարած ապօրինությանը։
«Անդրանիկ Քոչարյանին որ տեսնեք, հարցրեք. եթե «Հայաստան» խմբակցությունը Հանձնաժողովի նախագահի տեղակալի պաշտոնում թեկնածու չի առաջադրել, ապա Հանձնաժողովի արտահերթ նիստն ի՞նչ օրակարգով էր հրավիրվել, և ի՞նչ որոշման նախագիծ է դրվել օրակարգի հիմքում: ԱԺ «Հայաստան» խմբակցության կողմից թեկնածու չառաջադրելու պարագայում Հանձնաժողովի արտահերթ նիստ չէր կարող հրավիրվել՝ օրակարգի բացակայության և որոշման նախագծի բացակայության հիմքով: Խճճվել է Անդրանիկ Քոչարյանը»,- նշել է Ղազինյանը։ Չենք կիսում այդ կարծիքը, Անդրանիկ Քոչարյանը չի խճճվել, պարզապես հնարավորինս ձգձգում է հանձնաժողովի բուն պարտականությունների կատարումը, ինչպես դա արել է կես տարի շարունակ։
Սամսոն Պետրոսյան
