Սոցիալական իրավիճակը ցնցումներ կբերի Հայաստանին․ թանկացումը շարունակվում է

Ամանորից հետո հայ հանրությանը հերթական հարվածն է սպասվում։ Ջրից հետո թանկանալու է նաև էլեկտրաէներգիան։ «Հայաստանի էլեկտրական ցանցեր» ՓԲԸ–ն առաջարկում է ՀՀ բաժանորդներին վաճառվող էլեկտրաէներգիայի սակագինն ավելացնել 1 կՎտժ-ի դիմաց 4.7 դրամով։ Տեղեկությունը հայտնում է ՀՀ հանրային ծառայությունները կարգավորող հանձնաժողովը` նշելով, որ այս հարցով քննարկումներ կսկսվեն դեկտեմբերի 23-ից։

Վերջնական թանկացման հարցը կորոշվի մինչև 2022թ.–ի փետրվարը, քանի որ նոր սակագնային տարին մեկնարկելու է փետրվարի 1-ից։ Ընդ որում` թանկացման դեպքում առաջարկվում է սոցիալապես անապահով խավերի համար սակագները թողնել անփոփոխ, ամսական մինչև 200 կՎտ/ժ սպառում ունեցող բնակիչների համար սակագներն ավելացնել 1.5 դրամով, ամսական 201-400 կՎտժ սպառում ունեցող բնակիչների համար` 3.5 դրամով։ Իսկ մնացած սպառողների համար` 5.5 դրամով։ Հանձնաժողովը նաև հայտնում է, որ էլեկտրաէներգետիկ համակարգում կատարված վերլուծությունները ցույց են տվել, որ 2022 թվականի փետրվարի 1-ից սկսվող սակագնային տարում գործող սակագների պահպանման պարագայում կառաջանա 23.8 մլրդ դրամի ֆինանսական ճեղքվածք։

Հիշեցնենք, որ հունվարի 1-ից 20.47 դրամով կթանկանա նաև ջրի սակագինը։ Սոցիալապես անապահով բաժանորդների համար սակագինը կմնա անփոփոխ՝ 180 դրամ, իսկ մյուս բաժանորդների համար կդառնա 200,47 դրամ։ Մինչ փաշինյանական իշխանությունները խաբում են երկնիշ աճի հեքիաթներով, թանկացումները շարունակվում են գրեթե բոլոր ուղղություններով։ Սննդի, դեղամիջոցների, վառելիքի, առաջին անհրաժեշտության այլ ապրանքների թանկացմանը հաջորդում են կոմունալ ծառայությունների թանկացումները։

2015 թվականին էլեկտրաէներգիայի սակագնի թանկացման փորձերը, հիշեցնենք, հանգեցրին «Էլեկտրիկ Երևան» շարժման, որոնք քաղաքական լուրջ ցնցումներ հարուցեցին Հայաստանում։ Այս դեպքում, թերևս, նման շարժումների և նախաձեռնությունների ականատեսը չենք դառնա, հետպատերազմյան Հայաստանում հանրույթի մեծ մասն ապատիկ վիճակում է, փորձում է հեռու մնալ ցնցումներից։ Այդ հանգամանքից էլ լիուլի օգտվում են գործող ապազգային իշխանությունները՝ հընթացս իրականացնելով քաղաքական և տնտեսական ռեսուրսների զավթումը։ ՏԻՄ ընտրություններից հետո փաշինյանական թիմը հասկացել է, որ այլևս հենարան չունի հանրության մեջ, և այլ՝ զարտուղի ճանապարհներով փորձում է ավելի մեծ իշխանական լծակներ կուտակել իր ձեռքում։ Անհույս գործ է, իհարկե։ Ի վերջո, նման վարքը, զուգորդված սոցիալական խնդիրների սրման հետ, Հայաստանում անխուսափելիորեն հանգեցնելու են լուրջ ցնցումների։

Տիգրան Ավետիսյան