Բարձր պաշտոն՝ քրեական վեց գործերով անցնող պաշտոնյային․ ինչպե՞ս են պայքարում կոռուպցիայի դեմ

Կոտայքի մարզի Աբովյան քաղաքը երեկ քաղաքապետ ընտրեց․ ԲՀԿ թեկնածուն Գագիկ Ծառուկյանի թիկնազորի պետ Էդուարդ Բաբայանն էր, ով հաղթեց իշխանության ներկայացուցիչ Պավել Ցուգունյանին։ Նույն օրն իսկ Նիկոլ Փաշինյանը Աբովյանի արդեն նախկին քաղաքապետ Վահագն Գևորգյանին նշանակեց Ջրային պետական կոմիտեի նախագահի պաշտոնում։ Փաստաբան Նորայր Նորիկյանն ուշագրավ հրապարակում էր արել, հայտնել, թե 2020 և 2021թթ. ընթացքում գործող իշխանությունները հնարավոր ամեն միջոց գործադրել են՝ Վահագն Գևորգյանին քրեական պատասխանատվության ենթարկելու համար:

«Ավելի՛ն, տարբեր հրապարակումների համաձայն՝ մինչև 2020թ. դեկտեմբեր ամսվա դրությամբ 6 քրեական գործ է հարուցված եղել, որոնցում շոշափվել է Վ. Գևորգյանի գործունեությունը: Ավելի՛ն, նա քրեական գործով ներգրավվել է որպես մեղադրյալ՝ պետական կամ համայնքային սեփականություն հանդիսացող հողամասերի ինքնակամ զավթման, ինչպես նաև շենքերի և շինությունների ինքնակամ կառուցումը կասեցնելու, կանխարգելելու ուղղությամբ օրենքով սահմանված կարգով միջոցներ չձեռնարկելու համար»,- հայտնել է Նորիկյանը:

Գործող իշխանությունները որևէ կերպ չեն մեկնաբանել Գևորգյանի նշանակումը։ Նրա կենսագրությունում էլ չկա որևէ տող, որ Աբովյանի նախկին քաղաքապետը կապ ունի ջրային ոլորտի հետ։ Ըստ երևույթին, նրա նշանակումը ոչ թե տրամաբանված քայլ էր, այլ պարգևատրում քաղաքական նպատակներից։ Սոցիալական ցանցերում կարծիքներ են հնչում, թե Գևորգյանին նշանակել են այդ պաշտոնին պարզապես մեկ բանի համար, որ չի առաջադրվել Աբովյանի քաղաքապետի պաշտոնի համար, թեև նախորդ ընտրություններում հաղթել էր ՔՊ մեկ այլ ներկայացուցչի։ Իսկ այսօր Նիկոլ Փաշինյանը ջրում է նրա դեմ հարուցված քրեական գործերը, Ջրային պետական կոմիտեի նախագահ նշանակում։ Ահա այսպես են գործող իշխանությունները հարգում օրենքը, իրենց իսկ հարուցած քրեական գործերը։ Հետևությունը մեկն է. կա՛մ այդ բոլոր գործերը շինծու են եղել, և այդ մարդը ենթարկվել է ապօրինի քրեական հետապնդման, կա՛մ այդ քրեական գործերը ապօրինի ջրվել են քաղաքական որոշման արդյունքում:

Դավիթ Սանոսյան