Քաղաքագետ. Ադրբեջանը հետաքրքրված չէ ԵԱՀԿ Մինսկի խմբի գործունեությամբ
ՀԱՍԱՐԱԿՈՒԹՅՈՒՆ
regnum.ru-ն գրում է, որ Ադրբեջանական կողմը փորձելու է զրկել ԵԱՀԿ Մինսկի խմբին աշխատանքին բովանդակությունից: Այդ մասին REGNUM-ի թղթակցին ասել է քաղաքագետ Մարիամ Հովսեփյանը։ Փորձագետը այն կարծիքն է հայտնել, որ ԵԱՀԿ Մինսկի խմբի համանախագահությունը միակ համաձայնեցված ձևաչափն է, որն ունի միջազգային մանդատ Լեռնային Ղարաբաղի հակամարտության կարգավորման միջնորդական առաքելություն իրականացնելու համար։ Խնդիրն, ըստ փորձագետի, այն է, որ Ադրբեջանը հրաժարվում է հակամարտության կարգավորման ցանկացած բանակցություններից, քանի որ ցանկանում է պատերազմի ելքը պարտադրել որպես լուծում։ Այդ հարցում ծայրահեղ արմատական դիրքորոշում ընդունելով Բաքուն ձգտում է բովանդակությունից զրկել ԵԱՀԿ Մինսկի խմբի համանախագահների աշխատանքը։
«ԵԱՀԿ Մինսկի խմբի համանախագահների հովանու ներքո բանակցությունների վերսկսումը նախապայման է ղարաբաղյան հակամարտության համապարփակ կարգավորման և տարածաշրջանում կայուն խաղաղության հաստատման համար։ Ակնհայտ է, որ Ադրբեջանն ամեն կերպ կկանխի հակամարտության կարգավորման գործընթացի վերսկսումը և կգնա այդ քայլին, եթե զգա, որ իր ապակառուցողական դիրքորոշումը կարող է հանգեցնել Լեռնային Ղարաբաղի անկախության ճանաչմանը»,- ասել է քաղաքագետը։
Հիշեցնենք, որ ԵԱՀԿ Մինսկի խումբը ստեղծվել է 1992 թվականին Լեռնային Ղարաբաղում հակամարտության խաղաղ կարգավորման ուղիներ գտնելու նպատակով։ Մինսկի խումբը համանախագահում են Ռուսաստանը, ԱՄՆ-ը և Ֆրանսիան։ Խմբում ընդգրկված են Բելառուսը, Գերմանիան, Իտալիան, Թուրքիան, Ֆինլանդիան, Շվեդիան, ինչպես նաև Հայաստանը և Ադրբեջանը։
Նյութը հրապարակման պատրաստեց Կամո Խաչիկյանը
