Ալիևը ծաղրում է Փաշինյանին․ երկու ապտակ Բրյուսելից

Ադրբեջանից Հայաստան վերադարձած գերիների նկատմամբ փաշինյանական վարչախմբի բռնաճնշումներն Իլհամ Ալիևը անվարան օգտագործեց մեր երկրի դեմ։ Նման հնարավորության մասին գործող իշխանություններին շատերն էին զգուշացրել, սակայն իրենց եղկելի մտահղացումներն իրականացնելու, բանակն ու ռազմագերիներին վարկաբեկելու քաղաքականությամբ տարված՝ փաշինյանական վարչախումբը նույնիսկ այդ հարցում իրեն պարկեշտ չպահեց։ Բրյուսելում Ալիևը հարցազրույց է տվել l Pais իսպանական թերթին, մտավախություն է հայտնել, թե հայ գերիներին Հայաստան վերադարձնելով, նրանց հայրենիքում կարող են խոշտանգումների ենթարկել բանտերում:

«Մենք նրանց վերադարձրինք Հայաստան, նրանք ձերբակալեցին։ Հնարավոր է, որ խոշտանգեն այդ մարդկանց։ Մեր նախկին բանտարկյալների ցուցմունքները վկայում են, որ այդ մարդիկ ենթարկվելու են դաժան խոշտանգումների։ Հետևաբար, եթե ավելի շատ մարդկանց վերադարձնենք, նրանք կձերբակալվեն։ Սա իրական փաստ է, և դա կարելի է հաստատել»,- ասել է Ալիևը։

Թերևս, մեկնաբանություններն ավելորդ են, ՀՀ գործող իշխանություններն իրենց վարքով տվել են այսպես լկտիանալու հնարավորությունը թշնամի երկրի առաջնորդին։ Մեկ այլ ծաղր էլ ավտոճանապարհների բացման մասին հայտարարությունն էր։

Եվրոպական խորհրդի ղեկավար Շառլ Միշելը Ալիևի ու Փաշինյանի հանդիպումից հետո ասել է, որ «Հայաստանի ու Ադրբեջանի առաջնորդներին հաջողվել է երեկ Բրյուսելում համաձայնության հասնել երկաթգծի, բայց ոչ՝ ավտոմոբիլային հաղորդակցությունը բացելու հարցում, որը, փաստացի, վիճահարույց գլխավոր հարցերից մեկն էր»։

Մինչդեռ Ալիևը նույն թերթի հետ զրույցում պնդում է, որ Բաքուն կարողացել է համոզել Երևանին «ավտոճանապարհի բացման անխուսափելիությունը (Հայաստանով դեպի Նախիջևան)»:

«Նախկինում Հայաստանը դեմ էր ավտոմայրուղու բացմանը, բայց մենք կարողացանք համոզել նրանց, որ դա անխուսափելի է, և նրանք համաձայն են։ Այսպիսով, համաձայնությունը կա: Այժմ մենք քննարկում ենք այդ միջանցքների իրավական ռեժիմը, մասնավորապես՝ Զանգեզուրի միջանցքի, որն Ադրբեջանով անցնում է Հայաստան, ապա՝ Նախիջևան։ Մենք դեռ որոշ չլուծված խնդիրներ ունենք»,- ասել է Ալիևը։

4,5 ժամ տևած հանդիպմանը, ի դեպ, Միշելը որոշ ժամանակ առանձին է թողել Ալիևին և Փաշինյանին։ Թե ինչ են պայմանավորվել վերջիններս, այդպես էլ չենք իմանա։ Համենայն դեպս, հանրությունը հերթական հոգեբանական հարվածը ստացավ՝ տեսնելով իր երկիրը ներկայացնողի ողորմելի վիճակը։

Արմեն Սերոբյան