Քրեական մեթոդներով՝ դեպի պայծառ ապագա․ ժողովրդավարությունը մեռավ Թալինում

Եթե Հայաստանի Հանրապետությունն ունենար սրտացավ և իրենց առաքելությանը նվիրված իրավապահներ, նրանք պարտադրված կլինեին քննել և հասկանալ, թե ինչ է կատարվում Արագածոտնի մարզի Թալին համայնքում, ինչպես և ինչ մեթոդներով Նիկոլ Փաշինյանին ու նրա կուսակիցներին հաջողվեց զավթել իշխանությունը ՏԻՄ ընտրություններում ստացած անբավարար քվեներից հետո։ Ցավոք, չունենք այդպիսի իրավապահներ, իսկ ժողովրդավարության մասին օրնիբուն ճառող դավադիր վարչախմբին հաջողվեց քրեական մեթոդներով յուրացնել Թալինի համայնքապետի պաշտոնը։

Դեկտեմբերի 5-ին կայացած ընտրությունների արդյունքներով «Քաղաքացիական պայմանագիրը» ստացել էր 10 մանդատ ավագանու 21 տեղերից։ Թալին խոշորացված համայնքի ավագանու ընտրություններին մասնակցած՝ «Զարթոնք» ազգային քրիստոնեական կուսակցությունը ստացել էր 6 մանդատ, «Հայք» լիբերալ կուսակցությունը՝ 3 մանդատ, «Մեր համայնքը» կուսակցությունների դաշինքը՝ 2 մանդատ։ Ուղիղ մեկ շաբաթ առաջ ընդդիմադիր ուժերը հրապարակային հուշագիր ստորագրեցին, միավորվեցին և պարտավորվեցին ստանձնել համայնքի կառավարման պատասխանատվությունը: Ընդ որում, ավելի շատ քվեներ ստացած կուսակցությունը համայնքապետի պաշտոնը համաձայնվեց զիջել «Հայք» լիբերալ կուսակցությանը, որպեսզի թույլ չտան փաշինյանական կոհորտայի կողմից քաղաքային իշխանության զավթումը։ Այդ հայտարարությունից հետո, մեր աղբյուրների փոխանցմամբ, գործող իշխանությունները ՔՊ թեկնածու Տավրոս Սափեյանին քաղաքապետ կարգելու համար դիմեցին քրեական մեթոդների, շանտաժի ու ահաբեկման, Թալինում վախի մթնոլորտ սերմանելու միջոցով իրենց ապօրինի մտահղացման իրագործմանը։

«Հայք» կուսակցության ցուցակը գլխավորում էր Թալինի թիվ 1 դպրոցի ֆիզկուլտուրայի ուսուցիչ Կարեն Գրիգորյանը։ Վերջինս երեկ հայտարարություն է տարածել, թե ՏԻՄ ընտրությունների հետընտրական լարվածությունը թոթափելու նպատակով՝ Թալին խոշորացված համայնքում առաջադրված «Հայք» լիբերալ կուսակցությունը որոշում է կայացրել հրաժարվել մանդատներից։ Ընտրացուցակում ընդգրկված բոլոր թեկնածուները կներկայացնեն ինքնաբացարկի դիմումներ: Իսկ երեք մանդատները կբաժանվեն մյուս մասնակից ուժերի միջև , ինչը թույլ կտա «Քաղաքացիական պայմանագիր» կուսակցությանը ստանալ մեծամասնություն և իրենց թեկնածուին դարձնել քաղաքապետ։ Իսկ պայքարը լքած կուսակցությանը քվե տված 1624 թալինցիներն իրենց խաբված կզգան։ Թալինն, ի դեպ, եզակի չէ, մյուս համայնքներում էլ փաշինյանական վարչախումբն աշխատում է նման մեթոդներով։ Ամեն ինչ հանուն իշխանազավթման, ահա սա է Նիկոլ Փաշինյանի միակ կարգախոսը։

Տիգրան Բաբայան