Իշխանությունը սեփական պատասխանատվության տեղափոխում է այլ անձանց վրա
ՔԱՂԱՔԱԿԱՆՈՒԹՅՈՒՆ
Վերջերս հրապարակվեցին գերությունից վերադարձածների ցուցմունքներ, ըստ որոնց՝ Շիրակի մարզի 62 զինվոր՝ ամբողջությամբ սպառազինված, առանց որևէ փամփուշտ կրակելու կամովի գերի են հանձնվել 4-7 ադրբեջանցի զինվորականի, ինչին նախորդել էր նաև ԱԺ նախագահի հայտարարությունը։ Դեկտեմբերի 4-ին Հայաստան վերադարձած 10 գերիներից 5-ին մեղադրանք է առաջադրվել քրեական օրենսգրքի 365-րդ հոդվածի 3-րդ մասով։
Այս թեմայով զրուցել ենք իրավապաշտպան Զարուհի Հովհաննիսյանի հետ։
Հարցին, թե իրավապաշտպանն ինչպես է վերաբերում գերիների շուրջ կատարվող դեպքերին` Զարուհի Հովհաննիսյան ասաց․ «Իրականում, այն ինչ կատարվում է գերիների շուրջ ես շատ ծանր եմ տանում։ Ազնիվ չէ շահարկել կամ նույնիսկ թիրախավորել այն մարդկանց, որոնք գտնվել են ծանրագույն պայմաններում, ունեցել են լրջագույյն խնդիրներ՝ կապված խոշտանգումների, սպանվելու սպառնալիքի և այլնի հետ։ Իշխանության վարքագծի մասով ուզում եմ մի քանի նկատառում անել․ նախ նրանք ընտրությունների ժամանակ փորձում էին հերոսացնել գերիներին, որպեսզի վերարտադրեին իրենց իշխանությունը, ինչն ասում են նաև գերիների հարազատները, որ իրենց խոստում է տրված եղել, որ վերընտրվելուց հետո գերիների հարցը կլուծվի։ Հիմա՝ իշխանությունը պահպանելու նպատակով նրանց թիրախավորում են, անարգում են, վախեցնում, նույնիսկ փորձում են հրապարակել տարբեր տիպի ցուցմունքներ, ինչն անթույլատրելի է, որովհետև դեռևս գործը չի ավարտվել ու դատարան չի ուղարկվել։ Գերիներին հերոսացնելու և անարգելու գործընթացները տեղավորվում են նեղ խմբային շահերի մեջ՝ վերարտադրելու և պահպանելու իշխանությունը։ Մյուս խնդիրը սեփական պատասխանատվության տեղափոխումն է այլ անձանց վրա։ Պատերազմի ավարտից անմիջապես հետո վարչապետն անընդհատ ասում էր՝ դուք չեկաք, դուք չկռվեցիք, այսինքն՝ իր պատասխանատվությունը, պարտավորությունը ժողովրդի վրա է տեղափոխում, այժմ մարդկանց պաշտպանելու ու իրենց քաղաքացիության երկիր տեղափոխելու իր անկարողությունը փորձում է տեղափոխել գերիների վրա»։
Նյութը հրապարակման պատրաստեց Կամո Խաչիկյանը
