Մանրամասներ Ներքին Հանդում թշնամու առաջխաղացման լուրերի վերաբերյալ
ՀԱՍԱՐԱԿՈՒԹՅՈՒՆ
Լրագրող Դավիթ Գալստյանը ֆեյսբուքյան իր էջում գրում է, որ Ադրբեջանը Ներքին Հանդի հատվածում էլի առաջ է եկել 2 ուղղություններով:
«2022 թ․ մարտին գյուղացիները ասեցին, որ ադրբեջանական զորքը առաջ ա էկել հին գյուղի/գերեզմանի ուղղությամբ (սլաք 1)։ ՊՆ-ն ասեց, որ 2021 թ. ա էղել, ձմեռը գնացել են, իսկ 2022 թ․ հետ են էկել։
N.B. Ճանապարհը դեպի էտ դիրք գցել են 2022 թ․ մարտ-ապրիլին։
Բայց դրանով չեն սահմանափակվել։
Նկարում երևում ա, որ խորացել են նաև անմիջապես Ներքին Հանդի ուղղությամբ ու ավելի հարավ (դեպի Վարդասար) — սլաքներ 2 ու 3։
P.S. Հիշացնեմ, որ մի քանի ուղղությամբ առաջ են էկել նաև հենց Վարդասարի հատվածում»,- ասված է գրառման մեջ։
Քիչ առաջ ՊՆ-ն հայտարարություն տարածեց, որ լրատվամիջոցներում և սոցիալական ցանցերում տարածվող տեղեկությունը, թե «ադրբեջանական ստորաբաժանումները կրկին առաջ են եկել ՀՀ Սյունիքի մարզի Ներքին Հանդ գյուղի դիմաց գտնվող լեռնային տեղանքում», չի համապատասխանում իրականությանը։
Կապան համայնքի ղեկավար Գևորգ Փարսյանը 1or.am-ի հետ զրույցում ասաց, որ թշնամու նոր առաջխաղացում չկա.
«Նախկին առաջխաղացումն է, որի մասին արդեն բարձրաձայնվել է: Բոլոր ուղղություններով ամեն ինչ նորմալ է, Ներքին Հանդը շեշտվում է, քանի որ նախկինում այդ տարածքում է եղել ՀՀ սուվերեն տարածք ներխուժումը»:
Ներքին Հանդի վարչական ղեկավար Խաչատուր Բաղդասարյանը մեզ հետ զրույցում հաստատեց համայնքի ղեկավարի խոսքերը.
«Առաջխաղացում չկա, համենայն դեպս, մենք տեղյակ չենք. ո՛չ գյուղում կան նման խոսակցություններ, ո՛չ դիրքերում: Չեմ կարող ասել՝ որտեղից են նման խոսակցություններ տարածվել, ամեն ինչ նույն ձև է, ոնց կար նախկինում»:
Մարիամ Նալբանդյան
