Փոխարժեք՝
475.8
$
529
7.57

Ծխախոտի մասին օրենքում փոփոխությունները կլինեն մինչև տարեվերջ

Օրերս տեղեկություն էր տարածվել, որ ԱԺ տնտեսական հարցերի մշտական հանձնաժողովի նախաձեռնությամբ «Ծխախոտի իրացման, սպառման և օգտագործման սահմանափակումների մասին» նոր օրինագիծ է մշակվում, քանի որ գործող օրենքը չի համապատասխանում ԵԱՏՄ պահանջներին: Վարկած կար, որ մշակվող նոր օրինագիծը կարող է փաստի առջև կանգնեցնել ոչ միայն ծխախոտ արտադրող, այլև դրա սպառմամբ զբաղվող ընկերություններին:

Հարցերի մասին պարզաբանում ստանալու համար 1or.am-ը զրուցել է ԱԺ տնտեսական հարցերի մշտական հանձնաժողովի նախագահ Բաբկեն Թունյանի հետ:

- Պարոն Թունյան, ճի՞շտ է արդյոք, որ «Ծխախոտի իրացման, սպառման և օգտագործման սահմանափակումների մասին» նոր օրինագիծ է մշակվում, քանի որ գործող օրենքը չի համապատասխանում ԵԱՏՄ պահանջներին:

- Դեռ նախագիծ կամ հեղինակ չկա, պարզապես պատգամավորները օրենքի հետ կապված քննարկումներ են իրականացնում: Խոսքը ոչ թե նոր օրենքի մասին է, այլ՝ ընդունված օրենքում որոշակի փոփոխություններ իրականացնելու մասին:

- Խոսքը ի՞նչ փոփոխությունների մասին է:

- ԵԱՏՄ օրենքի պահանջներին համապատասխանեցնելը դրույթներից մեկն է: Բացի այդ, ավելի վաղ մենք կրկին քննարկել ենք ընդունված օրենքի արդյունքում տնտեսական էֆեկտների հետ կապված հարցեր՝ հաշվի առնելով սահմանափակումները: Մեկ անգամ ևս կվերանայենք եղածը, հասկանալու համար թե որքանով է նպատակահարմար այդ ձևով և այդ ժամկետներում օրենքում փոփոխություններ իրականացնելը: Այն, ինչի մասին ներկայում խոսում ենք, նորություն չէ, քանի որ օրենքի ընդունման ժամանակ ևս հայտարարվել է, որ Ազգային ժողովը հետագայում պետք է օրենքում փոփոխություններ նախաձեռնի: Հիմա այդ հարցն ենք քննարկում: Երբ նախագիծը շրջանառության մեջ մտնի, այն ժամանակ պարզ կլինի ամեն ինչ:

- Ե՞րբ եք մտադիր նախագիծը շրջանառության մեջ դնել:

- Կարծում եմ մինչև այս տարեվերջ:

 

 

Արմինե Գրիգորյան

www.1or.am 

website by Sargssyan