Փոխարժեք՝
475.8
$
529
7.57

Երուսաղեմի մոտ նեոլիթի ժամանակների քաղաք են գտել

Իսրայելցի գիտնականները ժամանակակից Երուսաղեմի մոտակայքում գտել են հնագույն մեծ բնակավայրի մնացորդներ, որտեղ նեոլիթի դարաշրջանում շուրջ երեք հազար մարդ է ապրել: Ռիա նովոստիի հաղորդմամբ, բնակավայրը հայտնաբերվել է ավտոմայրուղու լայնացման աշխատանքների ժամանակ: Հետազոտողների խոսքով, այս գտածոն փոխում է պատկերացումները, որ հնագույն հուդայական պետությունը այն ժամանակվա աշխարհի ծայրամասն է եղել և անապատային ու մեկուսացված տարածաշրջան:

«Առաջին անգամ Իսրայելում հայտնաբերվում է նեոլիթի շրջանի նման խոշոր բնակավայր, որը գոյություն է ունեցել 9 հազար տարի առաջ: Այստեղ ապրել է առնվազն 2-3 հազար մարդ, այսինքն ժամանակակից քաղաքների հետ համեմատելի քանակ»,- ասել են պեղումների ղեկավաները:

Հնագետները գտել են խոշոր բնակելի տների, հասարակական և պաշտամունքային կառույցների մնացորդներ: Շինությունների միջև տարբեր փողոցներ են եղել, ինչը վկայում է քաղաքաշինական ծրագրավորման բարձր մակարդակի մասին: Հայտնաբերված արտեֆակտերի մեջ հազարավոր նետերի, դանակների, մանգաղների ու տապարների գլխիկներ, փոքրիկ քանդակների և զարդերի կտորներ կան:

«Տների մեջ ու դրանց միջև հայտնաբերվել են տարբեր ծիսակարգերի թաղումներ՝ օգտակար կամ թանկարժեք իրերով, որոնք, ինչպես կարծում էին, կարող էին պետք գալ հանգուցյալին այն աշխարհում»,- ասվում է հաղորդագրության մեջ:

Անատոլիական օբսիդիանից կամ Կարմիր ծովի խեցիներից պատրաստված իրերը վկայում են հնագույն աշխարհի այլ հատվածների հետ զարգացած կապերի մասին։ 

website by Sargssyan